Napdeng ki 11 tylli ki jylla ha ka ri, ka West Jaiñtia Hills kum kawei na ki jaka rep shynrai ba shah jied ha ka CDP

Jowai, Jylliew 29: Ka National Horticulture Board lyngba ka Ministry of Agriculture & Farmer Welfare jong ka sorkar India ha ryngkat ka jingïatrei lang bad ka Meghalaya State Agriculture Marketing Board bad ka Directorate of Horticulture mynta ka sngi kala pynlong ïa ka ‘Krishi Mela Cum Awareness Programme’ ha Multi Facility Center Shangpung Molibang, shi bynta ban pynsngewthuh sha ki nongrep shaphang ki skim jong ka sorkar bala pyntrei da ka Cluster Development Programme.
Haba ïakren bad ka Navita Mahanta ba dei peit ïa ka North Eastern Region National Horticulture Guwahati kala ong ba ka sorkar India na Delhi la jied tang 11 tylli ki jylla hapoh ka ri khnang ba ki nongrep jong kitei ki jylla kin dang lah ban pynkiew shuh shuh ïa ki mar rep jong ki, katba ha ka jylla Meghalaya lyngba ka Cluster Development Programme (CDP) la jied kyrpang ïa ka West Jaiñtia Hills namar ka jingdon ïa u mar rep bala bna nam u ‘Shynrai Lakadong’.
Kala ong ba ka jingwan kane ka prokram ki nongrep kin ïoh shibun ki jingbatai bnai halor ka rukom treikam jong kane ka CDP na ka bynta ka jingbha jingmiat jong ka rep ka riang bad ki lad jingïarap kiba lah ban ïoh na ka sorkar.
Kala ïathuh ym lah ban leh ba ka don ka jingeh ha kaba ïadei bad ka rukom pynïaid ïew ïa une u mar hynrei lyngba ka jingïateh bad ka State Marketing Board yn sa lah ban pynïaid ïew bha ïa une u mar rep.
Ïa kane ka prokram mynta ka sngi la pynbit pynbiang lyngba ka ophis jong ka District Horticulture Officer West Jaiñtia Hills District bad la don bun ki kynhun SHG bad ki Society kiba la la wan sha kane ka prokram bad ban pynim ruh ïa ki mar rep khamtam ïa u shynrai Lakadong uba ka bna halor ka jingbha ka Curcumin ba u don, ha ka juh ka por kila ïoh shibun ki jinghikai.
La ïathuh ba ka Cluster Development Programme kan ïarap ïa ki nongrep naduh ka rukom sdang ïa ka kam rep, ka rukom pynmih bad haduh ka jingpynïaid ïew ïa ki marrep bad kane ka long ka kabu ksiar na ka bynta ki nongrep ka West Jaiñtia Hills District. Ong u ma E.M.H. Passah (DHO).
Ïa kane ka prokram la wan ban plie da u MDC ka thaiñ u ma J. Treilang Suchiang kum u kongsan uba la thang ruh ïa ka sharak lem bad ki ophisar jong katei ka tnad, haba ai jingkren ula kyntu ïa ki nongrep ka thaiñ ba kin minot namar kane ka jaka ka long kaba siesoh bha ha ka kam rep kam riang. Ula ong ba wat na ka liang ka sorkar kan ïaleh ban ai jingïarap ïa ki nongrep lyngba ki symbai, ki dawai bad ki skim bapher bapher.