Shillong, Jylliew 10 : Ka Mylliem Constituency ka la dei kawei kawei na ki constituency kaba la sdang ban shongshit bha khamtam hadien ba u MLA bad Myntri barim jong ka sorkar jylla, Bah Pynshai Manik Syiem u la rai ban aireng biang ha kane ka elekshon MLA kaban long ha u 2023.
Lah ban kdew hangne, ba u Bah PM Syiem hadien ka jingshah rem noh ha u snem 2008 um shym la mih shuh ba aireng na Mylliem ha ki elekshon ba kham shadien.
Na ka liang u Bah Pynshai haba ïakren bad u Mawphor u la ïathuh ba ka rai kaba u shim ban mih aireng biang ha kane ka lympung kadei hadien ka jingïasyllok bad ka jingshong pyrkhat kaba sani bha bad ki riewrangbah khamtam kito kiba la donlang syndah bad u naduh ki snem ba la dep.
U la ïathuh ruh ba ha ki snem ba um shym la don shuh syndah syndah bad ki paidbah ka Mylliem Constituency hynrei ka khun jong u, ka Kong Teilinia Thangkhiew ka la don ryngkat bad ki ha kitei ki snem kum ka MDC.
Ha ka jingïakren bad utei u rangbah u la ong, “Ka jingwan biang jong ka ban ïakhun na Mylliem ka long ban pynskhem bad tei bïang ïa ka jingïadei bad ki paidbah jong ka Mylliem. Nga kwah ruh ban leh shibun kiba khraw na ka bynta ka lawei ban sa wan khamtam eh na bynta ban ïa kren ïa ki ishu jong ka jylla ha Iing Dorbar Thawaiñ ka jylla.”
Halor ka jingkylli na kano ka party kaba u pynkhreh ban aireng ha kane ka elekshon, ka jubab kaba utei u rangbah u ai ka long, “Nga la ju jop kum u kyrtong shimet namar ha u 2008 ba nga pan tiket na ka NCP, ki briew ha kato ka por ki kyntait namar ki ong ba kadei ka party nongwei, kumta nga la shah rem noh. Ka jinglong kyrtong ne MLA shimet ruh ka don ka jingmyntoi kaba khraw bha namar haba long shimet, ïoh lut ka hok ban kren ne ong ei ei namar kam don ka jingteh ha ki kyndon jong ka party.”
Nalorkata, u la ong ruh ba ha ka por ba u shimti kum u MLA, ka Mylliem ka dang sah shrah bha ha baroh ki liang, ym don surok, ym don community hall, ym don ki madan ïalehkai ba biang, ki iing skul ba biang. Ha kato ka por ka jingïoh na ka sorkar ruh kaba rit, ka skim na sorkar pdeng ruh ka dang duna bha hynrei, da ka jingstad kaba u Blei u ai hanga nga la lah ban leh bun kiei kiei na bynta ka constituency bad khamtam eh ban noh synñiang biang ha ka jylla baroh kawei lyngba ka jingïatai ha ka Iing Dorbar Thawaiñ ka jylla.
U Bah Pynshai u ong ruh ba ka jingwanphai jong u sha ka saiñpyrthei kadei ka kam mishon ym ka kam ban leh business ne pynlong kam khaïi ïa ka.
