Shillong, Risaw: Ka Amazon’s SVP India bad ka Emerging Markets dang shen ki la pyllait ïa ka jingïohi jngai jong ki ha kaba ïadei bad ka Amazon ha India ha ka bynta ba saw jong ka Amazon Smbhav Summit ha New Delhi.
U la pynpaw ïa ka jingsngewkmen shaphang ka jingkiew bad ka jinglah ban pynïar ïa ka kam ha ka ïew ha India na ka bynta ban ai jingshakri sha ki million ngut ki nongthied bad ki nongdie ha India. Dang shen ka Amazon ka la pynbna ïa ka jingbei tyngka kaba heh kaba long $15 billion ha India ha baroh ki kam khaïi jong ka kat ha ka snem 2030 bad kaban ïai bteng ban ïatehlok ban kyntiew ïa ka India ha ka spah snem ba 21.
Ha kane ka lympung, ka Amazon ka la pynbna ïa bun tylli ki sienjam treikam ban kyntiew ïa ka ïoh ka kot ka India ha ka liang ka digital bad ka jingshalan ïa ki tiar ki tar sha bar, kaba ïahap bad ka jingsmai jong ka India.
Ka kompeni ka la dep ban soi ïa ka soskular bad ka India Post na ka bynta ban pynpoi ïa ki tiar ki tar sha kylleng khnang ba yn nang lah ban pynïar ïa ka jingkhaïi ha ka liang ka ïew e-commerce ban lah ban shalan ïa ki mar ki mata jong ki lak tylli ki karkhana kiba rit, kiba pdeng bad kiba kham heh ne ki micro, small bad medium enterprises (MSME) ha kylleng ka ri.
Nalor kane, ka Amazon ka la ïatehlok bad ka tnad Indian Railways’ Dedicated Freight Corridor Corporation of India (DFC) ban ïarap ïa ki nongdie ba kin pynpoi ïa ki tiar ki tar kham sted sha ki nongthied ha kylleng ka India. Kane ka pynlong ïa ka Amazon kum ka kompany e-commerce ba nyngkong ha India ban shim ïa ka jingshakri jong ka DFC na ka bynta ban pynpoi ïa ki tiar ki tar sha ki nongthied lyngba ki lynti rel ha India.
Ka Amazon ka pynbna ba kan ïai bteng ban wanrah ïa ka jingshakri ha kaba nyngkong eh ban pyndonkam ïa ka jingstad treikam ka AI na ka bynta ki nongdie ïa kaba la tip kum ka ‘Amazon -AI’ bad pynlong ïa ka jingshalan ïa ki tiar ki tar kaba leit beit sha ki nongthied ne direct-to-consumer (D2C) ha kylleng ka India lyngba ka multi-channel fulfilment.
Kane kan plie lad plie lynti na ka bynta ki kam khaïi kiba rit ba kin lah ban kiew ha ki kam khaïi lyngba ka online. Kum shi bynta jong ka jingtrei tyngeh jong ki na ka bynta ka India, ka Amazon ka la kular ban pynkylla digital ïa kumba 10 million ki MSME, ban kyntiew ïa ka jingïoh sha ka $20 billion ha ka liang ka jingshalan sha ki e-commerce bad thaw haduh 2 million tylli ki kam ha India kat ha ka snem 2025. Shuh shuh ka Amazon ka dang don ha ka lynti ban pynbiang ïa kine ki jingkular bad kine ki jingpynbna kin long ka bynta ba kongsan ban pynlong ïa kane ka kompany ba kan lah ban poi sha ka thong jong ka.
