Nang pynkhlaiñ ka NPP ïa ka shnat treikam ki longkmie sa ha Ri-Bhoi, Kong Wanmontimai kum ka President
Ngim kheiñ sting ban pynkhreh ïa ka thma ha u 2028: Grace
Nongpoh, Nailur 06: Kum ka jingpynkhlaiñ shuh shuh ïaka party NPP kaba synshar bad lamkhmat ruh ïaka sorkar jylla, ka States President jong ka National People’s Party Women’s Front ka kong Grace Mary Kharpuri mynta ka sngi kala leit ban pynskhem syndon ïaka body ba thymmai jong ka NPWF, Ri-Bhoi District haka jingïalang kaba la long mynta ka sngi ha iing Dorbar ha Nongpoh.
Ha kane ka sngi ka jingpynskhem ïaki nongïalam ba thymmai bad ba pura jong ka NPWF la sakhi ruh da ki heh nongïalam ka NPP naduh u Bah Sosthenes Sohtun MLA ka Jirang, ka Kong Rona Khymdeit, MDC ka Nongpoh kaba dei ruh ka State Working President, Kong N. Nongpluh, Vice President ka National NPWF, u Bah Samlin Malngiang Secretary incharge ka Ri Bhoi, Bah Clement Mawlong President ka NPP Ri Bhoi, Bah Pyndap lang Wahlang President ka NPYF Ri-Bhoi, ki nongïalam ka Nongpoh Block naduh u Bah Rayonald Kharkamni bad kiwei kiwei ki heh NPP naka jylla bad Ri-Bhoi District.
Ki nongïalam ba hakhmat jong ka NPWF Ri-Bhoi District bala bynshet ïaka kam bad pynskhem syndon mynta ka sngi ki kynthup ïaka kong Wanmontimai Marbaniang kum ka President, Aitidora Wahlang Working President, Santi Jyrwa Vice President, Mardilet Kharnaior Vice President, Rosilia Makri General Secretary, Veronica Santi Warjri Spokesperson, Macdalyne S. Mawlong Adviser lem bad kiwei kiwei ki dkhot bad ki nongïalam.
Ka kong Grace Mary Kharpuri kum ka kongsan bad ka nongïalam ka NPWF haka jylla haba kren ha katei ka sngi kala ong ba party NPP ka dei ka party kaba khlaiñ bad kaba lamkhmat ruh ïaka sorkar jylla, hynrei kum ki nongtrei jong ka party kim kheiñ sting ban pynkhreh ïaka thma man ka 5 snem bad khamtam ban shakri sha ki paidbah ba kum ki longkmie ruh ki don ka jingkitkhlieh ban shakri naka bynta ka jingmyntoi ki paidbah ha baroh ki liang lyngba ka party NPP.
Ka la kyntu ruh ïa kitei ki nongïalam ba thymmai ban nym kheiñ sting ban pynkhreh ïaka elekshon 2028 hynrei ban lur naduh ki kyndong kynshrot, ban trei shitrhem ban kyntiew ïaka party namar u snem ba khatduh hi shuwa ka elekshon u dei tang u snem ban pyndep ïa baroh ki kam bala trei haki snem bala leit.