Katba nangmih ki sngi, katta ka kam shakri paidbah (political services) ruh ka la nang i shongshit bad itynnad shuh shuh namarba ka jingbym lah nguid shuh ki riewshisha bad ki nongïalam jong ki Balang bapher bapher halor ki kam thok bad kam shukor beiñ kine ki nongsain pisa pyrthei (politicians) ïa ki paidbah ba lui lui.
Ha ka por ba ïaleh MP Elecshon u (L) Rev.PBM Basaïawmoit, ki la mih bun ki jingkynthoh ba harrukom ba ki briew kiba la bat ïa ka kyrdan Pastor (Reverence) kim bit satia ban ïa khleh bad kynsum lang bad ki kam shakri paidbah (politics). Don pat kiba ai mynsiem bad pynshlur ruh ba kaba shakri ïa u para briew kalong hi ka jingshakri ïa u Blei.
Na ka result MP ha kito ka por, u (L) PBM Basaiwmoit u la ïoh bun bha ki vote bad imat, bun hi ki paidbah kiba kyrshan ïa ki Pastor ban mih sha ka kam shakri paidbah. Hynrei, naduh kham mynshwa ruh, ki don hi uwei ar ki Pastor kiba don bynta ha ki kam politik, don ruh kiba bat wat kum ki President ne Secretary ha ki Circle/Block Level.
Mynta u snem pat, ka jingkyrmen ka wan biang ba don katto katte ki briew kiba la bat teng ïa ka kyrdan Pastor ki la mih shakhmat ban shakri noh ïa u paidbah nalor ka jingshakri ïa ki Balang. Ka jingmih bad sei kyrtong ka seng Voice of People (VPP) na Mairang Assembly Constituency ïa ka kyrteng uwei u Pastor (Rev) uba angnud ban pynkylla bad pynthymmai noh ïa ka rukom pyrkhat ki briew sha kato ka thaiñ ka la pynkyndit ïa ki paidbah khamtam ïa ka Dome kaba hap kyrsan khlem poi pyrkhat wat u Speaker ruh, kaba la tei skhem bha ïa ka New building jong ka Assembly ha Mawdiangdiang dang shen.
Sa uwei pat u Pastor uba dei ruh u Doctor of Devinity (DD) u la kwah bad pynpaw pyrthei ban ïakhun Election noh na Jowai Constituency ha ka MLA Election 2023 ban sa wan shen.
Mynta ka taiew pat, sa u Pastor cum Social Activist, u Rev K.Pyrtuh u la mih kyrteng ban ïakhun noh ïa ka Election namar ka jingshah thok bad bym ler kine ki nongsynshar kiba bat mynta ïa ka bor sorkar ban peit bad khmih lem ïa ka jingeh, jingkordit ba u duk u suk, u thap u dap, u paidknup u paidtrap u ïa kynduh na ka por sha ka por.
Ka jingmih jong kine ki Pastor ban ïaleh ïa ka elekshon kan long ka jingkyrkhu ïa ki paidbah namar kaei kaba don hapoh ka dohnud jong ki ban shakri ïa ki para briew kin pynpaw shai ha kane ka elekshon ban wan.
Lada kane ka dei shisha ka jingpasiaw kaba napoh, kan don beit ka jingkylla ha ki katto katne ngut ki paidbah bad lada ka long ha kata ka rukom, ka dei ka dak jong ka jingsdang hynrei kam dei pat ban long ka jingkut noh.
