Shillong, Nailur 07 : Ka jingïoh lum na ka khajna GST baroh naduh u bnai Ïaiong haduh u Nailar 2024 na ka bynta ka Jylla Meghalaya ka long baroh 772 klur tyngka.
Shuh shuh ka jingïoh lum na bynta kajuh ka por ha u snem 2023 pat ka long 737 klur kaba kdew ba ka don ka jingkiew haduh 5persen ha ka jingïohlum, ong ka Finance Department ha ka kyrwoh khubor ha kane ka sngi Saitjain.
La kdew ruh ba ka jingkiew ha ka jingïoh lum haba phai sha kiwei pat ki jylla ka thain shatei lam-mihngi jong ka Ri ka long – Assam 7 persen, Arunachal Pradesh – 8 persen, Manipur 11persen, Mizoram 1persen, Nagaland 0persen,
ka Sikkim -16persen bad ka Tripura 11persen.
Ka kyrwoh ka la ong ruh ba ka Sorkar Jylla ka la mih ruh ban pynsngewthuh paidbah khamtam hapdeng ki trai jong ba buh ïa ki dukan rit kiba thied tiar na shabar ka jylla ba kin pyntikna ba ki kot ki sla thied jingthied kin dei beit ka Address na Meghalaya khnang ba ka khajna GST kan wan sha ka jylla Meghalaya.
Shuh shuh la ong ruh ba ki pynjur ka jingbishar bniah ban pyntikna ba kan ym don ka jinglait ei ka khajna.
“Ha kane ka Snem Mangtyngka mynta u snem ki la don haduh 376 tylli ki jingjïa kiba kot sha ka 121 klur kiba don mynta ha ka jingpeit bniah,” ong ka tnad. Shuh shuh la bynrap ba ka jingmih khubor ba ka don ka jinghiar ha ka jinglum khajna GST jong ka Jylla ka dei beit ki jingkhein jingdiah kiba tang shibnai (Ïaiong 2024) bad kam shym la khein lut ïa baroh ki jingjingkhein jingdiah.
Shuh shuh ka tnad ka la pyntip ba ka ka jinglum jingkhein ïa baroh ki khajna GST jong ka Jylla, kynthup ïa ka SGST, IGST bad CGST, ka pyni shai ïa ka ka jingkiew ka jingïoh lum.
“Ki jinglum ïa ka khajna GST ha Meghalaya ki la pyni ka jingkiew kaba 35.87 persen, 32.12 persen bad 16.66 persen ha u snem 2021-22, 22-23 bad 23-24. Ki jinglum GST ki la nang kiew shuh shuh na ka 1118 klur ha u snem 2021-22 sha ka 1723 klur ha u snem 2023-24,” la bynrap shuh shuh ka kyrwoh khubor.
