Lawbah, Ïaïong, 10: Na ka bynta ban pynkhlaiñ ïa ka party bad ban pynkhreh ïa ka election MLA ha u snem 2023, ka United Democratic Party (UDP) jong ka Mawsynram Circle hapoh ka jingïalam jong u bah Olansing Suin kum u President, ka la nang suhthied bad ïoh bor kat nangmih ki sngi da ka jingwan pynïasoh jong ki nongkyrshan na kiwei pat ki party sha ka party UDP.
Lah ban kdew ba da ka jingwan pynïasoh jong ki sha kane ka party, ka la nang ai mynsiem bad don ka jingkyrmen ba ka party UDP kan ïoh ban rah ïa ka jingjop donburom ha kane ka election MLA ha u snem 2023.
Kane ka jingnang khlaiñ jong ka party la sakhi ruh ha ka ba ka UDP Lawbah Zone ha ka 6 tarik u Ïaïong, 2022 ka la lum ïa ka jingïalang paidbah (General Meeting) jong baroh ki Primary Unit kiba hap hapoh ka Zone kiba kynthup ïa ka Lawbah, Mawlyngbna, Mawtepiew, Umtyllun, Mawkhan, Mawdon, Thyllaw, Nongrim Warding, Nonglait, Sinai bad Nongtrai.
Ha kane ka sngi da ki spah ngut ki nongtrei bad nongkyrshan jong ka party ki la wan ban ïashimbynta shitrhem. Ïa ka jingïalang la pynïaid da u president ka Lawbah Zone, u bah Lomes Marbaniang ha ka jingïadon ryngkat lang u President ka Mawsynram Circle, bah Olansing Suin, u President Youth Wing ka Mawsynram Circle, bahTamdor Risaw bad kiwei kiwei ki nongkitkam ba hakhmat ka party na ka Zone Sawsymper, Phlangwanbroi, Dangar bad Hatmawdon.
Ha kane ka sngi nyngkong eh la ïoh ban pdiang burom da u President ka UDP Lawbah Zone ïa ki nongkyrshan ba radbah jong ka party Congress bad NPP ha snem kiba la dep kiba la wan ban pynïasnoh mynta sha ka party UDP, kiba la pynpaw ba dei tang kane ka party ha Mawsynram Constituency hapoh ka jingïalam jong u bah Olansing Suin kaba don ka jingkyrmen ïa ka lawei jong ki bad ka dong ka thaiñ bad ïa ka konstitwensi baroh kawei.
Shuh shuh ha kajuh ka sngi la ïoh ruh ban pyllait paidbah da u President ka Circle ïa ka jingrwai ka party ba la pynbit pynbiang da u samla Pynbianglut Wanshnong.
