Nang khlaiñ ka UDP ha Mawkyrwat ba pynskhem ïa ki nongkitkam bathymmai ka Mawkyrwat Circle

Mawkyrwat, ‘Naitung, 24: Ka United Democratic Party (UDP) jong ka Mawkyrwat Circle mynta ha ka 23 tarik u ‘Naitung, 2022 ka la ïoh ïa ki nongkitkam ba thymmai ha kaba u President ka UDP jong ka South West Khasi Hills District, bah Pius Marweiñ u la ïoh ban pynskhem ïa ki ryngkat ka jingïadonlang u bah G.G. Bung Snaitang, Joint Secretary jong ka United Democratic Party (UDP) Central Body.
Ki nongkitkam kiba u bah Pius Marweiñ u la ïoh ban pynskhem ki long ïa ki nongkitkam jong ka United Democratic Party (UDP) Executive Committee Mawkyrwat Circle kaba dei jong ki Rangbah, ki nongkitkam jong ka United Democratic Party (UDP) jong ka Women’s Wing bad kumjuh ruh ki nongkitkam jong ka United Democratic Party (UDP) jong ka Youth Wing.
U President ka UDP jong ka South West Khasi Hills District, bah Pius Marweiñ haba kren ha ka jingïalang ban pynskhem ïa ki nongkitkam jong ka party u la pynpaw ka jingaikhublei na ka bynta jong ki nongkyrshan kiba la wan poi ha kane ka jingïalang bad kyrmen skhem da ka jingtrei shitom bad trei shitrhem jong ki ban pyntyllun ïa ka kam saiñ hima sima hapoh jong ka Mawkyrwat Circle bad kumjuh ruh ha ka Mawkyrwat Constituency baroh kawei.
“Bun kiba kynnoh ba ki party Riewlum ki kut tang hapoh Khanapara hynrei kim tip pat kaei kaba jia ha kine ki sngi ha kaba ka United Democratic Party (UDP) mynta ka kynti ka la nangkhlaiñ ymtang hapoh Khasi, Jaiñtia bad Ri Bhoi hynrei wat haduh ka Ri Lum Garo ruh ka la sdang ban bsuh khlieh. Namarkata, u la ai mynsiem na ka bynta ki paidbah nongkyrshan jong ka party ba kim dei ban noh mynsiem hynrei ki dei ban nang tur shakhmat ban trei ïa la ki kam hapoh jong ka Mawkyrwat Circle bad kumjuh ruh hapoh ka Mawkyrwat Constituency baroh kawei.
U la ong ruh ba kum ki nongïalam ba hakhmat jong ka circle kim dei ban dang shah pynthame ha kiwei pat ki party namar shwa ban dei ka por ban jied ïa ki nongmihkhmat kin sa don shibun kiba wan ban ban kren da kumne da kumta hynrei ïa kaei kaba ki ki lah ban leh kin long kiba ïeng skhem ha ka nongrim da kaba long kiba ïatylli bad long kiba ïatreilang.
Kiba la shah pynskhem kum ki nongïalam ba shakhmat ki long President u bah Shaiñkorlang Nongsiej bad Secretary u bah S.K. Budnah kiba dei jong ki rangbah, jong ki longkmie pat la pynskhem President ïa ka kong Shidalin Marngar bad Secretary ka kong Luckydora Lyngkhoi, Vice President ki don 5 ngut, Joint Secretary ki don 12 ngut, Treasurer ka kong Phuhsyntiew K. Lyngdoh, Publicity Secretary ka kong Kyrmenlin Lyngkhoi, Organising Secretary ka kong Milliancy Wanniang, Advisers ka kong Helen Thongni, kong Decimora Tympuin, bah Bateibok Marbaniang, bah Synsharlang Lyngkhoi, bad u bah Karnatic Lyngdoh ryngkat ki 9 ngut ki dkhot.
Katba jong ki samla pat la jied President ïa u bah Elevenson Wanniang bad Secretary u bah Bhalumlang Kharlyngdoh. Kiwei pat ki nongkitkam ki long u bah Erius Syiemlieh bad u bah Fuller Lyngdoh kum ki Working President, u bah Twaiding Thongni, bah Sunshine Thyrniang, bah Jhumsing Marwein, bad bah Founder Mawlieh kum ki Vice President, u Welding Shylla, u Kyrpang Lyngdoh, u Traling Sangriang, u Fuldenstar Syrman kum ki joint Secretary, u Anderson Lyngdoh kum u Public Secretary, u Koland Lyngdoh Sport Secretary, u Sherboklang Marbaniang Organising Secretary, u Canyson Marbaniang kum u Treasurer, bad ki Adviser ki long u Karnatic Lyngdoh, u Phrangkupar Syiemiong, u Mihsallan K. Turnia, u Mebankit Syiemlieh, u R. Ramsiej, u Baiohboldang Kharlyngdoh, u Definetis Dkhar, u Shemphang Shylla, u Welbonson Snaitang, u Bungsing Sohphoh lem bad kiwei kiwei de.
Ïa ka jingïalang la pynlong hapoh ka Community Hall, Mawkyrwat ha kaba u bah Anvil Lyngdoh, Chief Adviser jong la UDP Mawkyrwat Circle u la pynïaid ïa ka jingïalang. Ha kane ka sngi la sakhi lang ruh da ki ‘riew rangbah, ki longkmie bad kumjuh ruh ki samla.