Nang khlaiñ bor ka UDP ha Rangthong-Mawthynrew ba pynïasoh sa ki nongkyrshan ka NPP bad Congress

Mawkyrwat, ‘Naiwieng, 27: Ka United Democratic Party (UDP) jong ka Ranikor Circle katba nang mih ki sngi ka la nang khlaiñ bad i don jingkyrmen ban jop biang ha kaba ha ka ka sngi saitjaiñ jong ka taïew ki la ïoh ban pdiang sngewbha sa shisien ïa ki nongkyrshan ba dang wan rung thymmai sha ka UDP ha ka jingïalang ba la pynlong ha Shnong Rangthong – Mawthynrew, South West Khasi Hills District.
Kiba la leit ban pynïasoh sha ka UDP ki long na ki nongkyrshan jong ka National People’s Party (NPP) bad na ka Indian National Congress (INC) ha kaba u bah Pius Marweiñ ryngkat u bah G.G. Bung Snaitang ki la ïoh ban pdiang sngewbha ïa ki da kaba ki la pyndeng ïa ka mawphlor khnang ba kin long ki nongkyrshan ba pura jong ka UDP hapoh jong ka Ranikor Constituency.
U MLA/MDC jong ka Ranikor Constituency, bah Pius Marweiñ haba kren ha jingïa;lang ba la pynlong ha shnong Rangthong-Mawthynrew u la kren shai ba kum ka party hi ka don don hi ka jingkyrmen ban jop biang ha kane ka MLA Election 2023 namar kane ka sakhi ba ka jingwan pynïasoh jong ki nongkyrshan na kiwei pat ki party ka la nang ai mynsiem shuh shuh ïa u bad kumjuh ruh ïa ki nongkyrshan kiba rim.
U la ong ruh ba haba phai ha ki paidbah lei lei, kim don daw ei ei shuh ban ong ba ha kane ka kynti ba mynta kim don kita ki lad pynroi hadien ba u bah Pius u la shim kum u nongmihkhmat namar kumba ka paw ba baroh ki skhim kiba dei jong ki paidbah u la dep ban ai bad shibun bah ki kam pynroi u la leh hapoh ka konstitwensi ban ïa nujor ha ki 20 snem kiba la dep ha ka por ba Martin M. Danggo u la bat kum u nongmihkhmat bad watla u la bat ruh kum u myntri ha ka sorkar Jylla pynban u ju sam skhim tang ynda la jan ka elekshon ha kaba kane ka paw shai ba ka rukom treikam ka tlot.
Ha kane sngi u la kren ruh khyndiat ha kaba ïa dei bad ka MLA Election jong u snem 2023 ba kum ka party hi ka dang sngewskhem namar shibun ki paidbah na kawei pat ki party la ju ïoh ban pdiang sngewbha sha kane ka party UDP. “Ka jingwan pynïasoh ki paidbah, ka dei ka jingkwah jong ki hi ym da jingleit khroh jong ki nongïalam ka UDP ne na u kum u MLA hynrei namar ki ïohi ba ki rukom treikam jong u tang ha kine ki 4 snem tam ei ei”, ong u bah Pius.
Namarkata, kum ki paidbah haba ki la wan rung sha ka UDP nangne shakhmat kin sa don bun ki briew na kiwei de ki party ki ban sa wan pynthame da kumne da kumta ryngkat ki jingkular kiba bun jait bad kine ki ju mih ruh tang ha ki por elekshon bad ym tang katta, ki wan ïuhkjat ruh ha ki shnong ki thaw bad wat haduh ki thliew ki ïing kata tang shisien ha ka san snem bad ynda ki la jop kin sa klet noh. Kumta, u la buh ka jingkyrpad bad kyntu ba kumba la pynïasoh bad shah pdiang ïa ki ha kane ka ïing jong ka UDP ki dei ban long kiba skhem ka jingmut bad kin long ruh kiba rai kut ban nym kylla ïa kaei kaba ki ki la kular
U bah G.G. Bung Snaitang pat ha ka jingkren jong u u la ïathuh ba haduh mynta hi ha ka Ranikor Constituency ki kyrtong ki ban sa mihkhmat ha kane ka MLA Election 2023 ki dang don tang ar ngut kata tang u bah Pius Marweiñ na ka UDP bad u Martin M. Danggo na ka NPP kumba ka la paw hynrei ïa kiwei pat la shu ïohi tang ha ki khubor bad ki social media. Kumta, u la ong ba ka long kaba eh ban kin lah ban ïa kynduh ïa ki briew hapoh jong ka Ranikor Constituency tang ki khyndiat por namar ban ïeng ban ïa khun ka long kaba shitom ïa ki kyrtong ha kane ka thaiñ khlem da ïoh ban ïa kynduh hi markhmat.
U la kren ruh halor ka jingpaw kyrteng jong kawei ka longkmie kaba thmu ban ïeng ïaleh ha kane ka MLA Elekshon ba kam dei ban pynleh leh noh ei kai ïa ka por hynrei lada ka kwah ban ïeng ïaleh elekshon ka dei ban mih noh shakhmat ban pyni sha ki paidbah ym tang ban pyn i ha ki lad pathai khubor hynrei ban pyni sha ki paidbah ruh ïa ka jingkwah jong ka, namar u la i ba lad kwah ban ïeng ïaleh kam myntoi lada ym pat lah ban ïa kynduh ïa baroh ki paidbah jong ka dong ka thaiñ ha ka por kaba biang. “Ki nongïaleh elekshon ki dei ban don la ka nongrim haba ki thmu ban ïaleh namar khlem ka nongrim kin nym poi sha kano kano ka thong”, ong u bah G.G. Bung Snaitang.
Haba kren ha ka jingpdiang burom ïa ki nongkyrshan kiba thymmai, u bah G.G. Bung Snaitang u la ong ba kumba ki la deng ïa ka mawplor jong ka UDP, “to sngew long trai ryngkat ka jingïakyrshan bor bah bad ki nongkyrshan kiba rim khnang ba ka kam kan long kaba sei soh”.
Kiwei pat ki nongkren ha kane ka sngi ki long ruh na ki katto katne kiba dang wan rung thymmai ha ka United Democratic Party (UDP) ha ryngkat ka jingsakhi lang da ki longkmie longkpa, ki khun samla jong ka shnong Rangthong – Mawthynrew.