Nongpoh, Ïaiong 18: Ban pynpaw ïa ka jingpyrshah halor ka jingbym hun ïa ka rukom pynbeit pud pynbeit sam ka sorkar Meghalaya bad ka sorkar Assam ha ka kyrdan ki Myntri rangbah, ka Raid Warmawsaw Umsohbar mynta ka sngi ka la lum la lang ïa ki nogïalam Shnong bad ki paidbah nongshong shnong ki hynriew tylli ki ki shnnong kiba markhap pud ka Assam na ka bynta ban ïa kren halor kine ki kam pynbeit pud ba bun na ki paidbah nongshong shnong katei ka thain Khappud kim hun satia ïa kane ka jingpynbeit pud ba bun ki jak aba dang hap ha Meghalaya ki leit noh sha ka jylla Assam.
Ïa kane ka jingïakynduh lang la pynlong ha Madan Bakhlapara ha kaba ki nongïalam shnong bad ki paidbah na ki hynriew tylli ki shnong ki la shim bynta ban ïa kren bad ban pynpaw ïa ka jingpyrshah ba kim hun satia ïa kane ka kam pynbeit pud pynbeit sam hapdeng ka Assam bad ka Meghalaya.
Kitei ki hynriew tylli ki shnong ki kynthup ïa ka shnong Warmawsaw, Umsohbar, Bakhlapara, Jimirigang,Hawla bad ka Lyngkhung ba hap ha ka Raid Warmawsaw-Umsohbar. Ki paidbah nongshong shnong kitei ki hynriew tylli ki shnong ruh ki la poi ryntih ban ïa shim bynta ha kane ka jingïalang ban pyrshah halor ka kam pynbeit pund pynbeit sam.
Haba kren ha kane ka sngi, u Sordar ka Raid Warmawsaw-Umsohbar, u Bah Pingstone Pator u la ïathuh ba kane ka jingïalum lang kadei hi naka bynta ban pyrshah bad ban pynpaw ïa jingbym hun ïa rukom pynbeit pud pynbeit sam ki ar sorkar jong ki ar jylla ka Meghalaya bad Assam, namar ba bun hi ki jaka ki la leit lut sha Assam bad ba bun hi naki Nongshong Shnong hakane ka thain kim kwah satia ban pynhap sha ka jylla Assam bad ki angnud hi ban don ha ka jylla Meghalaya.
Ki nongïalamshnong jong kitei ki hynriew tylli ki shnong, haba kren ha kane ka sngi ki la pynpaw ba kim hun satia ka rukom wan jurip kita ki Regional Committee ka Assam bad Meghalaya, namar ïa ka kam ban pynbeit ïa ki jaka la shu shim rai tang da kaba shuh phah rah kti ïa ki paidbah la ki kwah ban don sha Assam ne sha Meghalaya bad khlem da bishar pat da ki kot ki sla ne ki dulir jaka na ki shnong bad wat ki Raid ki Hima ruh kim don jingtip satia halor kane ka kam pynbeit pud pynbeit sam.
Namarkata, na ka liang kitei ki nongïalam Raid bad nongïalam shnong ki la pynpaw ruh ba ki da pyrshah jur halor kane ka jingshim rai ban pynbeit pud pynbeit sam khlem da tih bniah ba kane ka dei tang ka jingpyndep rukom bad bun hi na ki paidbah bad ki shnong ki la shah leh donbor bad na ka liang ki nongïalam Raid bad nongïalam Shnong ki la pynpaw shuh shuh ba kin dang ïai pyrshah bad ki da pyrshah jur halor ka jingsoi ïa ka MOU da u myntri rangbah ka jylla Meghalaya bad Assam ba la shu rai ban pynbeit pud tang da kaba rah kti bad ym da ki kot ki sla ne ki dulir jong ki jaka ki pata, pynpaw ki nongïalam Raid bad nongïalam Shnong na kitei ki hynriew tylli ki shnong.
