Katba nangmih ki sngi, la i kumba ki jaka khamtam ha Motphran, Iewduh ka la long shaba palat ha kaba lada ïaid lynti la tyngkhuh para briew. Kane ka jingkhapngiah ka la tuh noh wat ïa ka jingitynnad jong ki sawdong sawkun kiba don sawdong jong kine ki jaka. Lada phai sha Motphran lane sha Khyndailad ki paidbah ba wankai na kiwei ki jylla ne na kiwei ki ri ki shem jingeh wat ban ïoh shondur ïalade namar ka jingbun kiba ïaid lynti.
Bunsien ki don bun ki daw kiba pynlong ïa kane ka jingkhapngiah, kawei lah ban kynnoh ba wat ki lynti ïaid kjat la shah kyntur pud noh da ki nongdie jingdie bad kawei pat ka long ba wat ki surok kali ruh ki la shu kut tang ha ka dheng kali kaba la pynsyrtok khait ym tang ïa kiba shong leit jingleit da ki kali hynrei ruh wat ïa kito kiba ïaid kjat ruh namar ka jingsawa na ki. Ha kiwei ki jylla ne ha kiwei ki ri, ka jingkhapngiah ka don beit hynrei ka jingdon ïa ka aiñ kaba khlain bad ïa ki nongsynshar kiba ïohi jngai ka pynlong ïa ki nongbah ban long kaba ïaid beit ïaid ryntih.
Katba hangne ha ka nongbah Shillong pat haba shu peit la i kum ka nongbah ne ka sor kam don satïa ki nongsynshar. Sngewthuh ba ma ki ruh ki don ka hok ban im bad ban kamai jakpoh hynrei kadei ka kamram jong ka sorkar ban peit ne ban buh noh la ka jong ka jaka ba kyrpang na ka bynta jong ki ba kin lah ban ïadie ïa thied katba ki mon. Lehse ha kaba sdang ki nongdie kin ong ba ym don nongthied hynrei lada ha kato ka jaka ba ju die ym don nongdie shuh khlem artatien kin leit beit sha ka jaka kaba la buh da ka sorkar.
Ka Shillong kaba la ïoh ïa ka nam kum ka Scotland jong ka ri Mihngi na ka por sha ka por ka la nanglip rong lip rong katba nangmih ki sngi bad lah ban ong ba mynta lei lei ka la dei pynban kawei na ki jaka kaba lymmuh tam ha kine ki sngi ha ka liang ka ïew ka hat. Ha kine ki sngi ka la long kaba thait bha ban rung shapoh jong ka Ïewduh namar ba la pynwit palat ïa ki lynti ïaid baroh bad kam long shuh ka ïew kaba khuid kaba suba. Nalor jong ka jingpynwit jong ki nongdie madan ha ki lynti ïew wat kito kiba don la ka jong ka basa ruh ki ïaleh katba lah ban phriang ïa ki mar jong ki palat ïa u pud u sam jong ka dukan ne ka basa jong ki. Kane ka la nang pynkhap ngiah shuh shuh ïa ka ïew kaba la bna nam jong ka ri Khasi.
Ki paidbah ki ju ud bha ban kiew sha Motphran bad Khyndailad ha ka sngi Saitjain namar ba jur palat ka jingkhapngiah na ka jingïaphngian shaba palat ka jingbunbriew kiba wan siew ban tda. Naduh surok, ka jingdheng kali kaba jur, nalor ka jingkhapngiah hapoh ïew ka long shaba palat.
Baroh ki lynti ïaid jong ka Ïewduh kiba la kham heh kim lait shuh na kane ka jingtur jong ki nongdie madan bad ruh ki nongdie dukan ba phriang ïa ki mar jong ki shabar la ka basa. Ka bor jong ka pisa shisha la la pynduh lut ïa baroh ki jingbit jingbiang jong ki paidbah bad ruh ka jingdon ïa ka Ïew kaba khuid bad kaba itynnad jong kane ka ri Khasi.
Lehse,ka Hima Mylliem, ka la dei ban pyrkhat noh da kawei pat ka lynti ban pynkylluid ïa ka Ïew da kaba wad ïa ki lad ki lynti jingïarap pisa khnang ban shna pynbna noh ïa ki basa kiba don hapoh ïew bad kiba don sawdong sawkun jong ka Ïewduh khnang ba ka Ïew ym tang ba kan wanrah ka jingkylluid hynrei kan wanrah ruh ïa ka jingkhuid jingsuba khnang ba kane ka Ïew kaba ju lehniam manla u snem bad pawnam naduh ka por u mynbarim kan ïoh biang ïa ka nam ba ka don.
