Nang jur ka jingjulor ka surok NH-6 ha Narpuh bad buh jingma ïa ki nongleit nongwan

Khliehriat Jylliew 10: Ka jinglong jingman ka surok national highway-6 ha ki thaiñ Narpuh mynta ka la jur bha ka jingjulor bad ka la buh jingma haduh katta katta ïa ki nongleit nongwan, kiba bun ki bynta jong ka surok ki la kylla kum ki pung ba dap da ka um ktieh. Ym tang katta, ki don ki jingkieng ruh kiba la paw da ki nar shabar bad ka jingkieng ha shnong Tongeng ka dei kaba la buh jingeh bad jingma ïa ki nongñiah kali kiba ñiah ïa ki kali heh bad ki kali rit ruh kumjuh. La lap ruh ba ka jingmaramot ïa ka surok da ki nongtrei jong ka national highway authority of India ka long kaba la shu trei tang dep ha kaba ïa ki maw la shu lum thup lynnong lynnong ha surok ha Umkiang. Mynta, ka bynta kaba buh jingma bha ïa ki nongleit nongwan ka dei ka bynta jong ka surok kaba don ha jingkieng Tongseng (Narpuh) bad ha kane ka jaka bun ki kali ki ju sahkut bad buh jingeh ruh ïa ki kali rit bad ki kali heh ban iaid na kane ka jingkieng. Ym tang katta, watla na ka liang ki sengbhalang na ka por sha ka por ki la dawa bad kyntu ïa ka NHAI ba kan maranot noh ïa ka surok, hynrei ka jingdawa kam poi shano shano ruh katba ki paidbah kiba leit ba wan pat ki mad ïa ka jingkordit kaba jur bad namar kane ka jinglong jingman ka surok ka ju wanrah ruh ïa ka jingdheng kali kaba khah khah ha katei ka thaiñ.