Nongpoh, Jylliew 18 : Ka United Democratic Party (UDP) ha Ri Bhoi shuwa ban kynjoh sha ka election 2023 ka la dang ioh bor shuh shuh ha Ri Bhoi bad kane ka la paw pyrthei mynta ka sngi hadien ba bun ki nongïalam ba hakhmat ka Congress bad kynthup ruh na ki nongïalam barim ki seng bhalang ki la wan ban pynïasoh sha ka UDP party na ka bynta ban dang pynkhlaiñ ïa kane ka party.
Kine ki nongïalam ki la wan ban pynïasoh sha ka UDP party, ka dei ha ka jingïalang kaba la long HYNINka sngi ha Ing Dorbar Hall, Sajer Nongpoh ha kaba la pdiang burom ïa ki da ki nongïalam ka UDP ba kynthup naduh u Dr. Jemino Mawthoh, General Secretary ka State UDP, u Bah Paul Lyngdoh, Working President, ka State UDP, u Bah Donbok Khymdeit, President ka UDP Ri Bhoi District, u Bah Balajied Rani, MDC ka Nongpoh bad kynthup kiwei kiwei ki nongïalam ka party.
Kitei nongïalam kiba la wan ban pynïasoh sha ka UPD Party ki kynthup ïa u Bah Doris Sulein, Nongseng ïa ka seng Confederation of Ri Bhoi People (CORP), u Samla Pynskhemborlang Sun, President ka Umroi Youth Congress Committee lem bad kiwei ki nongïalam seng bhalang bad ki nongïalam na ka party Congress.
Kumba la pynpaw da kitei ki nongïalam ba la wan ban pynïasoh sha ka party UDP, ka sur kaba la mih na ki ba ki la wan ban pynïasoh sha ka UDP party, ka dei halor ka nongrim ba ki la iohi ba dei tang ka UDP party kaba don jingkyrmen ba kan ïalam ïa ka sorkar ha ka election 2023 bad lait na ka UDP party kim don pat kiwe ki party ba ki paidbah ki dang shaniah na ka bynta ban kit ban bah ïa ka eh shon jong ka jylla.
Na ka liang ki nongïalam ka UDP ba kynthup naduh u Bah Donbok Khymdeit, uba dei u president ka UDP na Ri Bhoi, u Dr. Jemino Mawhthoh, General Secretary ka UDP hapoh ka jylla bad u Bah Paul Lyngdoh, Working President, haba kren ha kane ka sngi ki la pynpaw ïa ka jingsngewkmen bad ki khmih lynti ruh ba kajingwan pynïasoh kine ki samla sha ka UDP kan dang pynkhlaiñ bor ïa ka UDP ha kane ka election 2023 ban sa long hapoh ha ka jylla.
Kitei ki nongïalam ba hakhmat ka UDP ki la kren shai ruh ba ka UDP kan trei bor bah bad kan dang trei shitom ruh ban dang pynkhlain ïa ka party, namar ka jingangnud hi ka long ba ka UDP kan ioh ban synshar ha katei ka election 2023 ban sa long hapoh ka jylla.
