Nongpoh, Iaiong 25:Ka Ophis jong U District Malaria Officer, Nongpoh ka la rakhe hynne ka sngi nyngkong ia ka World Malaria Day ha Science Hall, Nongpoh.
La pyniaid ia kane ka Jingialang da i Dr. E Kalwing iba dei i District Malaria Officer, Ri Bhoi District iba la ai ruh ia ka maitphang halor kane ka sngi ba la rakhe ia ka World Malaria Day.
U Bah Pynshailang Kharkongor uba long ruh u VBD Consultant ula ai ka jingbatai shaphang kane ka jingpang khieshohrih bad kumno ka Ri Bhoi District ha kine ki khyndiat snem ka la hiar ha ka jingdon kiba ioh ia kane ka jingpang.
Ula kyntu ban long kiba lehkhuid ia ki rud ki kiar, ban pyndonkam ia ka musari haba thiah bad ban phah test snam ia lade lada ngi sngew shit ka met khnang ban tip ia la ka jong ka koit ka khiah.
U Bah Pynshai u la ai ia ka jingiaroh ia ki para nongtrei hapoh ka District kiba la pynlong ia kane ka jinghiar kane ka jingpang kita ki long naduh ki ASHAs, ki SW, ki ANMs bad ki Medical Oficer ha ki PHC/CHC.
Nangta u la ai ruh ia kajuh ka jingiaroh ia ki Shnong bad ki VHSNC hapoh ka District kiba la ju ia snoh kti lang ban pynlong ia ka District kaba kham duna ka jingdon kiba ioh ia kane ka jingpang. U la iathuh ruh ba ka Ri India mynta ka don ia ka thong ban pynduh jait ia ka Malaria ne ka Malaria Elimination.
Ha kane ka Jingrakhe la wan pynshongkun da u Bah R Kharbihkhiew, ADC Ri Bhoi District kum u kongsan bad ha ka jingkren jong u, ula ong ba u long uba bhabok ban ioh ban ia don bynta ha kane ka Programme namar ia lade u la mad teng ia kane ka jingpang ha ki por ba u dang don ha ka jingpule ha Kalkatta, West Bengal.
U la ai khublei ia baroh ki Nongtrei ha kane ka Tnad ba kin nang lah ban trei shitom khlem da ap ban ioh ia ka jingiaroh nangno nangno haba pyndep ia la ka kam bad pyndep hok.
U Bah R Kharbihkhiew u la ioh ruh ban sam ia ki Awards na ka bynta ki Best ASHA, Best SURVEILANCE WORKER bad Best SUB CENTRE hapoh ka District. I ASHA iba la ioh ia ka Best ASHA i dei i Kong Mercy Khongjoh, I Best SW la ioh da i Bah Arlyson Mawkhiew bad ka Tyrso Sub Centre ka dei ka Sub Centre kaba kham trei kam bha na baroh ki Sub Centre hapoh District.
La pynwai ia kane ka jingrakhe da ka jingaikhublei na i Dr. D. Blah iba long ruh i Addl. DMHO ia baroh kiba la ia wan ha kane ka jingialang kata naduh u Kongsan, ki medical Officer, bad ia baroh kiba la shah khot sngewbha kum i Dr. Pohshna iba dei i MS ka Bethany Outreach Hospital.
