Namarba la dep khot tender, shen yn sdang noh ka kam pynheh ïa ka Shillong Airport: Sniawbhalang Dhar

Shillong, Risaw 11: U Symbud Myntri Rangbah ka sorkar jylla uba khmih ïa ka tnat ka Kit ka Bah (Transport) u Bah Sniawbhalang Dhar u la pynbna ba ka jingkhot tender na ka bynta ban pynheh ïa ka Shillong airport la dep ban khot bad ka kam kan sa sdang noh shen.
Katkum ka jingong jong u, ki kam jingshim jaka ki la jan dep, bad ka jingsam ïa ka pisa haba ïadei bad ki jaka ki la sdang mynta sha ki trai jaka.
“Ïa ka tender la dep ban khot, kaba mut ba ka kam ka la ïaid shakhmat. Ka jingshim ïa ki jaka ruh ka la jan dep. Imat na ka bynta katto katne, ki la sdang ïa ka jingsam ïa ka pisa bai khyndew,” ong u Bah Sniawbhalang sha ki lad pathai khubor.
“Hadien ba la dep ban sam sha baroh ïa ka bai jaka, ngan sa lah ban ïathuh sha phi ïa ka dor jong ka jinglut halor ki kam shim jaka,” u la bynrap.
Katba ïa ka dor kaba thikna ka dang don hapdeng ka jingshim jingkheiñ kaba khatduh, u Bah Dhar u la pynthikna ba ka jinglut jingsep haba ïadei bad ka jingpynheh ïa kane ka kad liengsuiñ ka Shillong yn sa pynlut hi da ka sorkar pdeng, ym na ka jylla.
Haba pynpaw ka jingsngew skhem shaphang ka jinglah ban pyndep ïa kane ka project ha ka por kaba biang, u Bah Dhar u la pynpaw ka jingkyrmen ba ka jingpynheh ïa kane ka airport yn lah ban pyndep hapoh u snem 2027, ka ban pynlah ïa ki liengsuiñ kiba heh ban wan hiar ha kane ka kad liengsuiñ ka Shillong.
“Ngan pyrshang katba lah ban pyndep ïa ka airport kham kloi katba lah. Ha shwa u snem 2027, ngan sa lah ban ai sha phi ïa ki liengsuiñ kiba heh,” u la ong.