Namar la teh u kynjri jingïeit, soh sat ban bthat ïa ka jingïeit bad ki paidbah ka Nongkrem: Lambor

Shillong, K’Lyngkot 20: U MLA bad MDC barim jong ka Nongkrem u Bah Lambor Malniang u la pynpaw ba wat lada u khlem dei shuh u nongmih khmat hynrei un ym lah ban bthat ïa u kynjri jingïeit jong u bad jong ki paidbah ka Nongkrem Constituency hi baroh kawei.
Ïa kane u Bah Lambor u la pynpaw ha ka jingïalang ban plie paidbah ïa ka ophis ba thymmai jong ka Thrang Ban Kiew, ka Cluster Level Federation (CLF) jong ki 10 tylli ki VO jong ka Smit Circle kaba don ha Lumkynsai kaba dei kawei na ki dong jong ka shnong Smit Pyllun.
Ha kane ka sngi la ïa don lang ryngkat u Sordar jong ka Dorbar Shnong Smit Pyllun u Bah Pynshongdor Lyngdoh Nongbri bad kiwei kiwei de ki riew rangbah ha ka jingsakhi lang bad ki dkhot jong ki seng Self Help Group.
Ïa kane building la ïarap ban pynioh u Bah Lambor na ka Chief Minister Special Development Fund (CMSDF) ha ka mang pisa ba 10 lak tyngka kaba la wan lyngba ka ophis jong u Block Development Officer (BDO) jong ka Mawryngkneng C&RD.
Haba kren kum u kongsan u Bah Lambor u la ong, Ha kane ka por nga dap da ka jingkmen wat lada ngam dei shuh u ei u ei ne u nongmih khmat ban don ïa ka atiar hynrei ka mynsiem ka rhem bad dei namar ka don ka jingïeit na ka bynta ka shnong bad ka constituency ïa kaba la shim kum ka shnong trai ka jong nga.
“Ba ngan ong ngam don shuh ha ka bor kan suk ïa nga ban lait ka bun kam hynrei u kynjri jong ka jingïeit uba la teh ïa nga bad kane ka constituency bad ban bthat ïa uta u kynjri la sohsot bad dei na kata ka daw ba nga sa ïeng ha kane ka por ban kynduh biang kumne” ong u Bah Lambor.
Nga ai khublei kyrpang ïa u Myntri Rangbah ka jylla u Conrad K Sangma u la kloi ban ai ïa kane tang hadien ba nga leit ban kyrpad ïa hadien ka jingtynrong jong ki longkmie ka CLF ïa nga halor kane.
Haba nga kynduh ïa u Conrad u la kren sha nga hato phim thait ban rah ïa kum kine ki kot hadien ba phimlong eiei shuh, nga shu ong u nongïalam te u sah hi u nongïalam bad khlem da pynslem u la ai ïa ka mang tyngka bad kane ka ïing kala ïeng kumba ngi iohi mynta kadei ka jingïarap u myntri rangbah.
Shuh shuh u la ong, Ka lynti ïaid ka jong nga ka long tang kawei ka lynti khlem da peit khmat ïano ïano ruh khlem da kdew kti ïano ïano ruh bad da kawei ka sur nga leit bad nga ai nguh ïa u blei ba u pynlong kumne kumba nga long ba kiwei ki paralok kin sngap bad shah shkor ïa kaei kaba nga ong bad kane ka lynti kadei namar ka jingïeit ïa ka Nongkrem Constituency.