Namar ki kam shlur jong u Lamkupar Snaitang ban sei ïa ka met uba ïap jyllop ha Wah Umngi, pynkup burom ka FKJGP

Mawkyrwat, ‘Nailur, 13: Ka Federation of Khasi Jaiñtia & Garo Peoples (FKJGP) da ka mynsiem jong ka jingsngewkmen namar ki kam shlur ba uwei na ki dkhot jong ka seng u la leh bad ai jingïarap na ka bynta briew kiba donkam ka jingïarap kaba kyrkieh ha kiba bun ki liang khamtam eh ba u la ïarap ïa ki briew kiba la ngam jyllop, kum ka seng ka la ïoh ban pynkup burom kyrpang ïa u ha ka jingïalang ba la long ha ka hall jong ka Maharam Government Higher Secondary School, Mawkyrwat.
Katkum ka jingïoh jingtip, u bah Lamkupar Snaitang uba dei ruh kum u President jong ka FKJGP Umpung Unit uba na ka Shnong Umpung, South West Khasi Hills District uba dei ruh kum uwei na ki nongñiah kali kamai na ka thaiñ Mawkyrwat sha Shillong ha kaba lah ban ong ba u la dei uwei na ki “Nong Samaria ba bha” namar ki kam jingïarap jong ïa ki briew kiba la shem ha ka jinglanot ne wat ha thmir jong ka jingïap kiba ju jia ïa ki briew ha ki wah ki um ba heh.
Halor ka jinglehbha jong u bah Lamkupar Snaitang ka la paw pyrthei hadien ba u la leit ban ïarap ban sei ïa ka met ïap jong uwei u samla u ba la ngam jyllop ha wah Umngi uba na Mawlai, East Khasi Hills District bad kane ka wah kaba hap hapoh u pud jong ka South West Khasi Hills bad East Khasi Hills District ha kaba u la tyrwa hi da lade khlem da don mano mano ruh ba tyrwa ïa u ba un leit ïarap ban leit ngam shapoh um ban leit wad ban leit sei ïa ki samla kiba la ngam jyllop ha katei ka wah ha kaba kane ka jingjia ka la jia dang ha kine ki sngi ki bnai ba la dep.
Shuh shuh une u bah Lamkupar Snaitang u la ïathuh ba ha kiwei pat ki snem bad ki por ba la leit ruh u ju ïarap ïa ki briew ha ki wah ha ka thaiñ Umpung, Ranikor kiba ki katto katne ki briew ki la kum ngam jyllop hapoh um kum ha wah Kynshi ha Ranikor, ka wah Umngi u la ju leit ban ïa donkti ban ai ka jingïarap ban leit sei ïa ki briew bad bun na ki ki la lait im lyngba ka jingleit ïarap jong u.
U bah Lamkupar Snaitang haba kren ha ki lad pathai khubor u la ong ba naduh ba u ju mlien ban ai jingïarap ïa ki briew kiba kum bakla bad ngam jyllop hapoh um, um pat ju ïoh jing-ithuh ne ai kum ka khusnam ïa u hynrei dei tang ka Federation of Khasi Jaiñtia & Garo People (FKJGP) jong ka South West Khasi Hills District ka la ïoh ban pynkup burom bad kane ka dei ka khunsnam ba nyngkong eh ba u la ïoh ha ka por ba ka seng FKJGP ka pynlong ïa ka jingpynkup burom ïa ki dkhot bad pynthymmai Nongkitkam jong ka seng ha Mawkyrwat ha une u bnai ba la dep.
Kumta na ka liang jong u, u la pynpaw ka jingsngewnguh kaba khraw ïa ka FKJGP jong ka South West Khasi Hills District kaba la ithuh kyrpang ïa u kum uwei na ki ‘riew shlur bad u briew uba la leh isynei ïa ki briew ha ka dong ka thaiñ bad ha ka South West Khasi Hills District.
Namarkata, u bah Lamkupar Snaitang u la kyntu ïa baroh ki paidbah kiba ju wan ban lehkmen sngewbha bad wan ïa bam khana ha ki kynja wah kum ka wah Umngi, Wah Kynshi bad kiwei de ki um ki wah ba kim dei dei ban leh-shongshit ne leh-klumar bad sngewshngaiñ ban ïa jngi namar kim tip haduh katno ka long ka jinglong jong ka um bad ka long ruh kaba mynsaw namar ba ki um bad ki wah ha kane ka jylla Meghalaya ki don dang ki wah kiba dap tang da ki kroh ki krem suda bad kim lah ban ithuh haduh katno ka jingkhlaiñ ka bor tan jong ka um ka long.
Kumta u da kyrpad ba kin ïaleh ban kiar da kaba sngewshlur ha ki kynja wah namar ïoh kan wan ka jingmynsaw bad ruh ka lah ruh ban shim wat ïa ka jingim jong ki briew tang namar ka jingbym suidñiew jong ki hi.