Shillong, Jylliew 5: Ka Meghalaya Cricket Association (MCA) ka la ithuh kyrpang ïa u Everbloom Nongrum u khynnah dang khie samla na ka shnong Mawrynkneng uba la ïoh pdiang ïa ka khusnam Jeevan Raksha Padak Award na u President ka ri India halor ki kam shlur jong u ban pyllait im ïa la ki arngut ki paralok jong u na ki ar tylli ki jingjia.
Ka MCA ka la pynbna da ka bai bam (scholarship) na bynta une u khynnah uba la pha ïa la ka jong ka jingim ban pyllait im ïa la ki jong ki paralok na ki tyrsim jong ka jingïap. U Everbloom u la mih madan ha ka ïalehkai cricket na bynta ka East Khasi Hills Cricket Association (EKHCA).
Kum ban pynkynmaw hangne ba u Naitung jong u snem 2019, uwei u khynnah u la hap ha ha kawei ka thliew kaba jylliew bad u Everbloom Nongrum khlem jingsalia shuh ïa la ka jong ka jingim u la hiar sha ka thliew ban pyllait im ïa la u jong u paralok.
Hadien kane, ha Naitung jong u snem 2020, u Everbloom u la pyllait im sa ïa uwei pat u khynnah uba la hap ha katei ka juh ka thliew. Kumta halor kine ki kam shlur u Everbloom Nongrum ha u Naiwieng 2020 u la ïoh ka jingithuh kum u riew shlur da ka khusnam Raksha Padak Award ba la aiti da u President ka ri India.
Ka MCA ka la pynbna ïa kane ka scholarship na bynta u Everbloom Nongrum ha ka jingïalehkai final jong ka lympung ïalehkai District League T20 Tournament ba la pynïaid da ka East Khasi Hills Cricket Association kaba la pynlong ha Mawryngkneng ha ka sngi Saitjaiñ. Ha katei ka sngi la donlang u Secretary ka MCA u Bah Gideon Kharkongor bad u Treaurer ka MCA u Dhrubajyoti Thakuria nalor kiwei kiwei.
