Namar ka jingtwa surok sha ki thaiñ khappud kordit ki paidbah tang shu poi ka por lyiur

Khliehriat iaiong 13: Namar ka jingjur palat u slap bad ka jingbym bit bym biang ki surok bad ki lynti syngkien ha ki thaiñ khappud ha East Jaiñtia Hills District, mynta kine ki lynti ki surok ki la kylla kum ki lynti iaid ki wah bah bad ki kshaid bah ha kaba ym i long shuh ban iaid ki kali bad ban iaid ki briew, halor kane ki paidbah ha ki thaiñ ba khappud bad ka ri Bangladesh ki iakynduh jingeh bad jingsohsat haduh katta katta ha ka leit ka wan.
Ka shnong Borghat, ka dei kawei na ki shnong ha khappud kaba iakynduh kum katei ka jingeh ha kaba ka jingtwa ka khyndew bad ka jinghap ki maw ka la jur bha namar ka jingjur slap, ka um kaba lynshop bad ki maw kiba heh ki maw kiba rit baroh ki wan tuid sha surok ba ju iaid ki kali bad ka jinghap ka um ruh la i kum ka kshaid bad kane ka buh jingma haduh katta katta ïa ki kali ban iaid lyngba na kane ka surok ha Borghat.
Ym tang katta, kane ka jinglong jingman ki surok ha ki thaiñ khappud ki buh jingeh khamtam eh ïa kiba pang ba shitom kiba donkam ban leit shim dawai sha ki jaka sor kum sha Khliehriat, sha Umkiang, kumjuh ruh ki kali kiba kit ïa ki mar rep sha ki jaka ïew bad kumjuh ruh ki kali kiba kit ïa ki mar bam.
Lah ban kynthoh hangne ba dei na ka daw ka jingbym bit bym biang ki surok ki lynti ki syngkien ki paidbah ha ki thaiñ khappud ha East Jaiñtia Hills District kim banse ban ban jam sha kawei pat ka ri kata sha ri Bangladesh ban ioh ïa ki dawai bad ki sumar bad kumjuh ruh ban ioh ïa ki mar bam.
Ym lah ruh ban len ïa ka jingshisha ba ka tnat Border Security Force lyngba ki Border Out Post bapher bapher ruh man ka por ki ju theh ki jingiarap ïa ki paidbah ha ki thaiñ khappud, kum ki mar bam, ki dawai bad kumjuh ruh ki tiar kiba pyndonkam ha iïng ha sem.