Namar ka jingbteng ka jingtih bad shalan beain ïa u dewïong pyn ngat ka HC hapoh ki kyndon ‘Rule of Contempt ïa u SP ka EJHD

Khliehriat nohprah 8: Ka ïingbishar jong ka Meghalaya High Court ha ka hukum ba la pynmih dang shen ka la pynngat ïa u Superintendent of Police jong ka East Jaiñtia Hills District hapoh ki kyndon jong ka ‘Rule of Contempt kaba na ka daw ba ka dang don ka jingbteng jong ka jingtih bad jingkhaiï beaiñ ïa u dewiong hapoh ka district, la pynmih ïa kane ka hukum lyngba ka Full Bench jong ka ïing kashari kaba la long katkum ka kaiphot ba la phah da u Deputy Commissioner ka East Jaiñtia Hills District ha kaba ïadei bad ka jingma kaba ap ïa ka krem Liat Prah, kaba don ha East Jaiñtia Hills District kaba na ka daw ka jingtih dewïong ha ka thaiñ.
Katkum ka kaiphot na u Deputy Commissioner, la pynpaw ba ka don ka jingpyrshang ban tih beaiñ ïa u dewïong da kaba pyndonkam ruh ïa ki tiar pynbthei kaba buh jingma ïa ka krem Liatprah kaba don ha Shnongrim, East Jaiñtia Hills District, na ka liang u Deputy Commissioner u la hukum ïa ki majistor ba kin pynlong ïa ka jingleit jurip kaba khah khah bad la pynjari ruh ïa ki kyndon 144 CrPC Criminal Procedure Code 1973 ha ka thaiñ.
Katkum ka hukum kaba la wan na ka ïingbishar, la pynpaw ruh ba wat hapdeng ka jingmana ba la mana da ka National Green Tribunal ba la mana ban tih bad khaïi beaiñ ïa u dewïong ba la kubur ruh da ka iingkashari, hynrei ka jingtih beaiñ ïa u dewïong ka dang bteng, kaba lah ban don ruh ka jingïadon bynta lang ka sorkar bad wat ka jingpynshlur ruh’
Katkum ka kaiphot ba la wan na u justice Katakey u la pynpaw ba hashwa ka jing pynjari ïa ka hukum khang tih dewiong, u dewiong uba la dep tih lypa u don 8,90,670 MT ha East Jaiñtia Hills District, 3,86,253 MT ha West Khasi Hills District, 3,77,790 MT ha South Garo Hills District bad 2,99,545 MT ha South West Khasi Hills District, nalor u dewiong uba la dep thew uba don 19,54,259 MT hynrei dang don tam haduh 13 lak MT u dewiong uba khaïi tuh, ka ïingbishar kam don ka jingartatien ba u don u dewïong uba tam, ba la pynpaw da u Justice Katakey.
Ka ïingbishar ka la bthah ruh ba ha kaba ïadei bad u dewïong ba la dep tih lypa dei ban pynïaid kumba la dep rai.
Ha kaba ïadei bad ka Contempt case pyrshah ïa u Superintendent of Police, ka ïingbishar kan sa pynsngew ha kawei pat ka hearing kaba yn sa pynlong ha u bnai rymphang 2023.