Nongstoiñ, Naitung 24: Ka long kaei laei ka bym lah ban ngeit ba u ‘ñiang ryndia u dei u jingbam ba rem dor tam ha Nongstoiñ ha kaba ha kine ki sngi ka dor jong u ñiang ryndia ka poi haduh hynñiewspah arphew tyngka shi kilo. Haba pyrshang ban wad jingtip halor ka jingkiewdor jong u ‘ñiangryndia la sngewthuh ba ka dei na ka jingbun palat ki jingïakop khwai dohkha ha kylleng ki jaka.
Nalor kata ka buskit jong kiba jop ha ka ka jingïakop khwai ka long da ki bun lak tyngka kata tang na ka bynta u ba nyngkong, ba ar bad ba lai. Nalor kata ki consolation prize ruh ka long da ki phew hajar tyngka. Dei na kata ka daw ba haman la ki jingïakop kwai da ki hajar ngut ki rawon ki poi wat lada ka bai rung ka long da ki hajar ruh.
Ka long ruh kaba phylla ba lada ka bai rung ka long ar hajar tyngka ki dang don kiba rung tang marwei. Hynrei kiba kham bun ki rung lang saw haduh san ngut da kaba ïa synñiang lang ban pynmih ïa ka bai rung bad lada jia ba ki bha bok bad ki ïoh ïa ka buskit ki ïasam ïa ka pisa
Haba phai ha katei ka jingïakop khwai ym lah ban len ba na ki shi hajar ngut ki rawon kiba ïoh buskit ki long tang arphew ne laiphew ngut, katba kiba sah te ki hap ban shu leit ei ha ka bai rung, ka bai shong kali, ka bam ka dih, khamtam kito kiba dih kyiad.
Kam long shuh ruh kaba phylla ba haduh mynta, ym pat don kano kano ka jingïaleh kai kum ka phutbol, Volley ball, Basket ball ne kano kano ka Tournament kiba ka buskit kan kham heh ban ïa ka buskit ïakop khwai.
Ha West Khasi Hills ki don shibun kiwei pat ki tamasa ïalehkai kiba kaba pynlong da ki Club, ki riew shimet bad ki ophis sorkar na ka bynta ki samla jong ka district na ka bynta ba ki ba bun kin ïoh jingmyntoi ha ka jingim jong ki, hynrei ka buskit ka duna haduh katta katta.
