Nalor mynsngi, mynmiet ruh jurip ka MSPCB ïa ki Karkhana ha Byrnihat

Nongpoh, Rymphang 05: Kum ka jingïakhun pyrshah ban tehlakam ïa ki karkhana ba pynmih lyer jaboh kaba ktah ïa ka koit ka khiah ki paidbah bad ruh dang shen ki paidbah ha ka thain Byrnihat ki la ïa khih paidbah ban pyrshah halor ka jingshah ktah na ki lyer jaboh, ki heh ka Meghalaya Stte Pollution Control Board ki la bteng ban jurip kysan ïa ki Karkahana ha kaba hynnin ka sngi ki la leit ban khang haduh 6 tylli ki Karkhana ba pynkheiñ ain bad wat ha ka por mynmiet ruh ki la bteng ban jurip ïa ki Karkhana ha ka thain 13mer, Tamulkuchi.
Kitei ki 6 tylli ki Karkhana ba la shah khang khyrdep ha ka MSPCB ki kynthup ïa ka Shyam Century Ferro Alloys Pvt Ltd, ka Khasi Alloys Ltd, ka Nalari Ferro Alloys Pvt` Ltd, ka Pawan Casting Pvt Ltd, FW Ferro Tech Pvt Ltd bad ka SR Bio-Product Pvt Ltd.
Kum ban pynkynmaw, ka Byrnihat Area ka la dei kawei na ka jaka kaba la jaboh tam ka lyer ba la pynbna ha ka ri bad ka daw ka lah ban dei na ka jingdon ki Karkhana ym tang ha u pud u sam ka jylla Meghalaya bad ha khappud bad ka Assam ruh ki don shibun ki Karkhana kiba pynmih tdem bad kaba la ktah shisha ïa ka mariang bad ruh ïa ki paidbah kiba shong ba sah ha katei ka thain.
Haba kren sha ki lad pathai khubor halor ka jingjurip ïa kine ki Karkhana ba pynkheiñ aiñ, u Bah YF Laloo, Environmental Engineer ka MSPCB, u la ïathuh ba kane ka jingjurip ha ka por mynsngi bad ka por mynmiet la ju leh na ka por sha ka por, kaba long kawei na ka kam ban tehlakam ïa kito ki Kharkhana ba pynkheiñ ain bad kiba pynmih bun ïa ki tdem jaboh bad kane ka jingpynmih ïa ki tdem jaboh ka la pynlong ruh ïa ka MSPCB ban sdang jurip ruh naduh ka 24 tarik u bnai Kyllalyngkot 20225, kaba dei ruh hadien ka jingud jingnam ki padibah ka thain Byrnihat.
U la ong ruh ba ka MSPCB ym tang ba ka la jurip bad ka la tehlakam ruh ïa ki Karkhana kiba pynkheiñ aiñ bad la phah siew ruh ïa ka kuna na ka bynta kito kiba pynkheiñ aiñ (Environmental Compensation), ha kaba ka MSPCB ka la dain kuna T. 4 lak ïaka Shyam Century Ferro Alloys Private Limited bad T. 2 lak ïa ka Khasi Alloys Private Limited halor ka nongrim ba ki la pynmih tdm jaboh palat kaba long ka jingpynkheiñ aiñ.
Shuh shuh, u Bah Laloo, u la bynrap ruh da kaba ong, ba ka MSPCB ka kynduh jingeh ruh na ka daw ka jingduna ki nongtrei bad ka don tang kawei ka ophis treikam kaba ka hap ban peit ha kylleng ki Karkhana ha ka jylla, hynrei wat la katta ruh na ka liang ka MSPCB ka ju jurip na ka por sha ka por sha ka por ïa ki Karhana ba pynkheiñ aiñ ha kylleng ki jaka ka Meghalaya na ka bynta ban tehlakam ba ka jingdon ki Karkhana kam dei ban ktah ïa ka mariang bad ruh ïa ka koit ka khiah ki paidbah, u la bynrap.