Shillong, Nailur: Ka Khasi Student Union (KSU), Mawlai Circle ha ka sngi Baar ka 20 tarik u Nailur, 2022 ka la sam khusnam sha 65 ngut baroh ki samla ha ka kyrdan pule bapher bapher, naduh ka SSLC, HSSLC, post Graduate haduh PhD da ka Maitshaphrang Excellence Award bad ki la sam ruh ïa ki khusnam sha kiba jop ha ka ïakob Mawlai Inter School Competition 2022, ka ïakob ai rong ai rup (Painting) bad ka tyrko (debate) ha Community Hall, NEHU.
Ha ka ïakob airong halor ka Climate Change and Global Crisis ba la shim bynta da ki skul bapher napoh Mawlai la wan nyngkong u Badonkupar Rynjah, OM Roy Memorial Higher Secondarry Secondary, baar u Armiki Wahlang, Mawroh SS, balai Omelaaiphylla, Church of God, Ecclesia HSS bad ia ka khusnam consolation la ioh da ka Chevinia L Mawnai, Ai jingshai English SS.
Katba ha ka ïakob tyrko halor ka jingburom ïa la ka ktien ka kyntiew ïa ka jaitbynriew, la wan nyngkong ka Rikynti Lyngdoh, OM Roy Memorial HSS, baar Silveris M. Lyndem, Church of God, Ecclesia HSS, balai ka Deiniwanshwa Shylla, Church of God bad ïa ka nam Youngest Speaker la iohrah da ka Baphilaniewkor Wahlang, Mawroh SS.
Ka KSU Mawlai ka la pynkup burom ruh ïa kaba la ïoh khur takma rnong ha ka lympung ïakhun jong ka North East Zone Inter State Badminton Championship ka samla Elsarica Umdor.
Ha kane ka sngi la don lang u MLA ka Mawlai konstitwensi u bah Process T Sawkmie kum u kongsan ha ka jingdon ryngkat u Dr. Matbhador M. Khymdeit, u samla Ostarnic Marbaniang, organising secretary KSU, CEC kum ki symbud kongsan, u samla Biangbor L. Paliar, President ka KSU Mawlai Circle, ki nongïalam ka FKJGP, HNYF, ki nongïalam ka KSU, ki kmie ki kpa jong ki khynnah skul bad kiwei kiwei.
Haba ai jingkren u bah PT Sawkmie u pynpaw, ba wat hadiEn 50 snem jong ka jingioh ïa ka Jylla bapura, ka Meghalaya kan pat don university, ym pat don medical university, ym don policy ïa ki nonghikai kiba hap mih madan ban dawa la ka jong ka hok.U la pynpaw ba u la kren shaphang kine ha ïingdorbar kaba dang shu kut shen.
U ïathuh ruh sha ka jingïalang ba u la wan na ka longiing baduk, bad u long kumne kumba u long mynta baroh ka dei ka jingisynei bad jingdon ryngkat jong U Blei, u ïathuh ïa kane ban ai mynsiem ïa ki samla ba ki ruh kin longeiei, wat lada ki wan makna na ka ïing baduk, kaba kongsan ka long ban buh ia U Blei hakhmat duh ha ka jingim jong ki.
U pynpaw ruh ba shano ka jaitbynriew kan poi, lymda ym don ka seng KSU kaba trei na ka bynta ka bha ka miet jong ki paidbah ka jylla.
Haba ai jingkren sa na u Dr. Manbhador kum u symbud kongsan u la pynpaw ba ha kine ki sngi jong kiba bun ki jingtynjuh bad jingiakob, hynrei kine kim dei shuh ki por ban dang ïaleh da ka wait ka stih kum ha ki por ba la leit, hynrei ka jingïakhun ba mynta ka dei da ka jingstad jingshemphang bad da ka jingmut jingpyrkhat.
Ha kajuh ka por u la ïaroh ia ka KSU Mawlai haba ïa dei bad kane ka jingsam khusnam kaba ai mynsiem shisha ïa ki khun samla kiba don ha ki jingpule bapher bapher.Ha kane ka sngi la ïoh ruh ïa ka jingkren na u samla Ostarnic, na Biangbor, na u Rapborlang bad kiwei.
