Mawkyrwat, ‘Naitung 03: Ka Southern Border Sports Association (SBSA) kaba dei kawei ka kynhun kaba don ïa ka thong ban kyntiew shuh shuh ïa ki sap ki phong jong ki samla ha kaba ïa dei bad ki kam ïalehkai sport kiba hap hapoh jong ka Ranikor Civil Sub-Division, South West Khasi Hills District ha kaba ha kane ka Association bad ki nongkitkam ki long naduh u MLA ka Ranikor Constituency, u bah Pius Marweiñ uba bat ïa ka kyrdan kum u President, u bah Nararian Thongni kum u General Secretary bad u bah Kitborlang Syiemlieh kum u Vice President.
Namarkata, ki Nongkitkam jong ka Southern Border Sports Association (SBSA) haba kren ha ki lad pathai khubor ki la ong ba ka daw kaba kongsan tam ba ki thaw ïa ka Southern Border Sports Association watla ka la don ka lypa Mawkyrwat District Sports Association (MDSA) ka long namar haba phai ha ki kam ïalehkai sports la lap ba shibun ki samla jong ki thaiñ Border ki don shisha ïa ka sap bad shibun ruh kiba la paw bha ym tang ha ki jingïalehkai kynjatbol hynrei wat ha kiwei pat ki de ki kam ïalehkai.
Ym tang kata haba phai pat ha ki Sports Club bapher bapher ki shem shibun ki jingeh na ka daw ka jingjngai palat na ki shnong ki jong ki watla ki kwah ban ïa snohkti lang ban leit ïashim bynta hapoh ka Mawkyrwat District Sports Association (MDSA) ha Mawkyrwat kaba dei ka Head Quarter jong ka South West Khasi Hills District hynrei kim lah.
Namarkata, kum ki nongïalam jong ka Southern Border Sports Association ki sngew dei ban pynsngew ha ka Meghalaya Football Association (MFA) ba kan ithuh kyrpang noh ïa ka Southern Border Sports Association (SBSA) ba kan don noh la ka jong khnang ba kan long ka jingmyntoi ïa ki khun samla na kane ka thaiñ Ranikor baroh kawei.
Kane ka jingpynpaw jong ki la long ruh ba ki sngewthuh ba kam don jingktah ei ei ruh em ïa ka Mawkyrwat District Sports Association (MDSA) bad da kata ki samla ba don sap kin ïoh lad ban mih shakhmat ha ki kam ïalehkai bapher bapher ki ban sa ïoh ban pynlong hapoh jong ka Ranikor Civil Sub Division.
