Nalor ka jingshah tyllep ha ki mynder, mynta kaba shyrkhei tam dei ka jingïapaid ïapra, maham u President ka KSU

Shillong, Ïaïong 04: Ka Khasi Student Union ka la rakhe ïa ka sngi “Kyrsiew Ri” da kaba ïaid paidbah na Bharat Scouts and Guides Laban bad pynkut sha Lumshatsngi ha ka ryngkat ka riam tynrai u khun Khasi ha kaba bun bah ki la ïa leit ban ïa shim bynta ha kane ka jingiaid paidbah.
Hadien ka jingïaid paidbah la pynlong ïa ka jingïalang ha ka Shillong Vidyalaya Secondary School, Lumshatsngi haba kren ha kane ka jingïalang u President ka KSU u Samla Lambokstarwell Marngar u la ong ba ka seng ka kren ïa ki mat ki jura na kawei ka samoi trei kam sha kawei pat ka seng kam heh tang ka tyngam hynrei ha man kawei pa kawei ka seng ka shim ïa ki jingïakhih ka along kamjuh duh ïa ki dkhot ka KSU bad u la maham ruh da kaba ong ba kaba ma bad ba shyrkhei tam ha ka jaitbynriew Khasi kadei ka jingïapaid ïapra.
Ka jingkylli ka long ba ka seng kam shym la pynlong tamasa ïa ki mat ki jura ba ïadei bad ka jaidbynriew baroh kawei, lada kita ki paradoh para snam kiba im sngi ban kynthoh ban woh lada ki ai ka por jong ki tang shiteng ka long ba yn nym ïoh mynder shuh ha kane ka ri Khasi.
U President ka seng u la ong ba kane ka juk kaba hap im ban pyrkhat thymmai kum ki khun samla nangne sha khmat ki jingma ki ap ki jingkyllei ki mynder hapoh ka ri Hynñiewtrep ka long kaba ma haduh katta katta, ka jingshyrkhei kaba shyrkhei tam ka long ka jingïapaid ïa pra bad mano ba pynpaid, mano ba pynpra bad ua la ong ba don mano re mano sha lyndet.
Ha kane ka sngi u President ka KSU u khot uwer ïa ki khun samla ki longkmie ki longkpa ha kylleng ka Bri Hynñiewtrep to pyndonkam hok ïa la ka jong ka lyngkor ïa la ka iktiar ban ai ka jingkyrshan ba burom ïa ki khun samla ka Bri Hynñiewtrep kiba khih kiba ksar kiba ju kren na ka sngi sha ka sngi ïa ki mat ki jura jong ka ri bad ka jaidbynriew baroh kawei.
Ha kane ka sngi u President ka KSU u la ong ba nalor ki mynder ri la mih ruh bun ki myndie ri hapoh ka Bri Hynñiewtrep baroh kawei.
U la kdew ïa kaei kaba la jia ha ka jylla Assam bad ka jylla Tripura ba kan sa jia long ruh ha kane ka jylla ka jong ki ki khun samla lada kim kylla thiah kylla dem.
Kum ki dkhot ka seng KSU dei ban pynthikna ba ha kane ka por ba dei ban tei ïa ka ri bad ka jaidbynriew ha ka lynti jong ka hok bad ka jingshisha, dei ban skhem shuwa ha la ka nongrim ym dei ban ailad ka jingshah pharia jong ka jaidbynriew sharum bad shaneng lada don ka jingïatylli kawei ka jaidbynriew ka dei ka jaidbynriew kaba khlaiñ.