Nalor ka jingpyrshah ban wan rah ïa ka Casino ha Ri Bhoi

Nongpoh, Nailur 26: Ka Joint Action Committee Against Casino ha Ri Bhoi mynta ka sngi ki la shim syndon da ka rai ban leit dawa pynduh pyndam noh ïa ka Meghalaya Regulation of Gaming Act, 2021 na u Myntri Rangbah ka jylla nalor ka jingpyrshah kaba jur ban wan rah ïa ka Casino ha Ri Bhoi District.
Kane ka rai kaba kaba ki la shim ban leit dawa pynduh ïa katei ka Gaming Act, ka dei hadien ka jingïalang mir jingmut ba la wan ban shim bynta naduh ki nongmihkhmat ka Ri Bhoi, ki nongïalam Niam, ki Longkmie bad kumjuh ruh ki riew rangbah ka Ri Bhoi kaba la long mynta ka sngi ha ïing Dorbar Hall, Sajer ha Nongpoh.
Ha kane ka jingïalang ïa mir jingmut halor ka jingpyrshah ïa Casino la wan ban shim bynta naduh u MLA ka Nongpoh, u Bah Mayrald Born Syiem, u MLA ka Umroi, u Bah George B. Lyngdoh, u MLA ka Jirang, u Bah Sosthenes Sohtun, u Bah Balajied Rani, MDC ka Nongpoh bad kynthup ki nongïalam niam bad kiiwei kiwei ki riew rangbah kiba la shim lang kawewi ka rai ban pyrshah ïa ka Casino bad ruh ban dawa pynduh syndon ïa katei ka Gaming Act hapoh ka jylla Meghalaya.
Nalor kitei ki nongmihkhmat la don lang ruh naduh u President ka Synjuk ki Rangbah Shnong, u Bah B.B Makdoh, u President ka KSU, North Khasi Hills District Unit, u Samla Ferdynald Kharkamni, U President ka FKJGP, North Khasi Hills District Unit, u Bah Luis Star Lyngdoh bad u President ka HNYF, Northern Region, u Bah Marcus Marten bad kynthup kiwei kiwei ki nongïalam seng bad riew rangbah.
Haba kren sha ki lad pathai Khubor, u Secretary ka JAC bad uba dei ruh u President ka KSU North Khasi Hills District Unit, u Samla Ferdynald Kharkamni, u la ong ba lyngba kane ka jingïalang ïamir jingmut halor ka jingpyrshah ïa ka Casino, naduh ki riew rangbah, ki longkmie, ki MLA bad ki nongïalam ka JAC ki la rai ban leit kynduh ïa u Myntri Rangbah ka jylla, u Conrad K. Sangma na ka bynta ban dawa pynduh pyndam noh ïa ka Meghalaya Regulation of Gaming Act, 2021, nalor kaba ki la pyrshah ban wan rah ïa ka Casino ha Ri Bhoi District.
“Kumba la mih ka sur na kane ka jingïamir jingmut halor ka jingpyrshah ïa ka Casino, kiba pyrshah ki dei naduh ki Longkmie, ki riew rangbah, ki nongïalam niam bad kynthup ruh wat ki nongmihkhmat na Ri Bhoi kiba la ai ka jingkyrshan ban pyrshah ïa kane ka Casino bad ruh ban dawa pynduh shi syndon ïa katei ka Gaming Act ka sorkar Meghalaya” ong u Samla Kharkamni.
Shuh shuh, u la ïathuh ruh nalor katei ka jingdawa pynduh ïa katei ka gaming act, ka JAC ka la rai ruh ban pynlong da ka signature Campaign ha kylleng ki jaka ka Ri Bhoi bad ruh ban pynlong da ka jingïaid paidbah naduh nongpoh sha Secretariat haba leit kynduh ka JAC ïa u Myntri rangbah ha Secretariat ban dawa pynduh ïa ka Gaming Act bad ruh ban pynduh syndon ïa katei ka Casino ha Ri Bhoi ba ka JAC ka la khot la wer ym tang ki paidbah na Ri Bhoi bad na kiwei kiwei ki District hapoh ka jylla kiba don ka jingsngewkhia halor ka jingktah ka jingwan ka ktem Khalai, u la bynrap.
Na ka liang u Bah P.B Sylliang, Secretary ka Synjuk ki Rangbah Shnong bad u dkhot ka JAC, u la pyntip ba ka JAC kan sa leit ruh ban ïa kynduh ïa u CEM ka KHADC ban dawa mardor ba ka KHADC da lei lei kam dei ban ai trading license na ka bynta ban pynïaid ïa ka Casino ha Ri Bhoi bad kum ka JAC ryngkat ki paidbah ka Ri Bhoi kin ieng pyrshah ban wan rah ïa kane ka Casino ha Ri Bhoi kaba la pyrshah jur na baroh ki liang, u la bynrap.