Nongpoh, Naitung, 20: Ka shlem shna bad pynmih kali jong ka kompani Toyota kaba don ha nongbah Bengaluru, ka don ka thong ba hakhmat ban pynneh pynsah bad ïada ïa ka mei mariang khamtam ban wanrah ïa ki sienjam bad ki mat treikam ban pynbha ïa ka mariang bad ka lawei.
Ha kaba ïadei baad kane ka Toyota Kirloskar Motor ka la lah ban buh ïa ‘Ecozone’ kaba pher na kiwei pat kaba long ka jaka ban ioh jingtip shaphang ka mariang bad ka jingheh jong kane ka jaka ka don kumba 25 akar ïa kaba la buh hapoh jong ka phyllaw ka TKM.
Ha katei ka Ecozone ki don kumba 17 tylli ki Theme Park kiba la shna kyrpang haka rukom ban ai ka jingsngewthuh ha kaba ïadei bad ka mariang sawdong bad la shna ruh ban pyni nuksa kumno ka rukom sdang ki jingthaw ba im haka pyrthei haduh kine ki sngi ba mynta, ki jingshah ktah jong ka mariang namar ka jingdusmon u bynriew bad ka jingkyrpad ban donkam ban iada ïa ka mei mariang bad ïada ïa ka lawei jong u bynriew bad baroh ki jingthaw ba im.
Lyngba kane ka sienjam treikam, ka TKM ka thmu ban bsut ha ka jingmut jingpyrkhat jong ki khynnah, ban pynlong ïa ki kita ki nongïalam ki ban wanrah jingkylla ha ka mariang ba kumjuh ruh ban bteng ka jinghikai sha kiwei pat namar kane ka kompani ka don ka jingthmu ban wanrah ruh ïa ka jingpule kaba ïadei bad ka mariang sha kumba 10 hajar ngut ki khynnah man la u snem nangne shakhmat.
