Nalor ka jaka pynlang um pynkylla jaka jngohkai pyrthei ka tnad Soil & Water Conservation ha Tasku
Nongpoh, Nailur 26: Ka jingshimkhia jong ki ophisar ka tnad Soil and Water Conservation, Division Nongpoh ban pynkylla dur ïa kawei ka pung ha ka shnong Umlyngkdait, New Tasku kum ka jaka pynlang um bad ha ka juh ka por kum ka jaka jngohkai pyrthei ka la urlong hadien ba u myntri ka tnad C&RD ba dei ruh u MLA ka Jirang Constituency, u Bah Sosthenes Sohtun mynta ka sngi u la leit ban plie paidbah syndon ïa ka Water Harvesting Structure cum Eco Tourism Park ba la tei ha ka rukom kaba itynnad ha katei ka shnong.
Ïa katei ka Water Harvesting Structure cum Eco Tourism Park la tei ha ka jinglut kumba 1 klur lyngba ka jingbei tyngka da ka NABARD da ka jingangnud ba kan long ka jingkyrkhu bad ka jingmyntoi ïa ki paidbah ha katei ka shnong khamtam ban kyntiew ïa ka ioh ka kot jong ki paidbah nongshong shnong.
Ha katei ka sngi la sakhi ruh da ka jingdonlang u Zenedick D Shira Director ka tnad Soil and Water Conservation, u C Awasthi SDO (Civil) Patharkhmah Civil Sub Division, Bah K Synrem Divisional Officer, Soil & Water Conservation Division, Nongpoh, Bah U Kurbah EE PHE, ka kong Hamedari Marbañiang Asst. Soil and Water Conservation Officer, Bah Edwin Syngkli Rangbah Shnong lem bad kiwei kiwei ki ophisar bad ki paidbah nongshong shnong.
Ha katei ka sngi na ka liang ka tnad Soil and Water Conservation ka la ioh ruh ban pynlait ïa ki hajar tylli ki symbai dohkha sha katei ka pung.
Haba kren ha kane ka sngi na ka liang u Bah Sosthenes Sohtun kum u kongsan u la pynpaw ka jingsngewkmen ba khraw bad ai ruh ka jingïaroh ïa ki Officer kiba la trei shitom ban iohi ba katei ka project ka long kaba itynnad bad ka ban ai jingmyntoi ïa ki paidbah nongshong shnong watla ki dang don shibun ki jingduna ban dang hap ban shna bad ban pynitynnad ïa katei ka jaka.
U la kyntu ruh ïa ki paidbah ban sumar bha ïa katei ka jaka kaba dei ka nongkynti jong ki bad ka jingmyntoi ïa ka shnong hi baroh kawei khamtam ba kin sumar ruh ïa ki sawdong sawkun jong katei ka jaka naduh ki dieng ki siej, khnang ba ka um kan neh ka sah bad kan itynnad ka ban khring ruh ïa ki paidbah ban leitkai sha katei ka jaka kumba ki la buh ruh ïa ki lieng ban shangkai ha katei ka pung.