Nalor ba sam ïa ki tiar rep, ïathir ki nongrep bad ki Scientist ban kyntiew ïa ki kam rep ki kam riang
Nongpoh, Nohprah 08 : Ban ïa tai sani halor ki kam rep ki kam riang bad ba ki nongrep ki dei ban ioh jingmyntoi na ki kam rep ki kam riang, ka College of Post Graduate Studies in Agricultural Sciences (CPGSAS), Central Agricultural University (CAU), Umiam ha ka sngi Saitjaiñ ka la pynlong da ka prokram ban ïa mir jingmut hapdeng ki nongrep bad ki Scientist bad kumjuh ruh la sam ïa ki tiar rep sha ki nongrep ha ka jingïalang kaba la long ha ka Shnong Umbang Sumer ha Ri Bhoi District.
Kumba 63 ngut ki nongrep kiba la kham paw ha ka kam rep ka kam riang ki la shim bynta ha kane ka prorkam ïa mir jingmut halor ki kam rep ki kam riang bad ka thong jong kane ka jingïamir jingmut ka dei ban pynkhlaiñ bor ïa ki nongrep bad kumjuh ruh ban tip kham bha halor kata ka Integrated Pest Management (IPM) ban ïa khun ïa ki khniang kiba pynjot ïa ki mar rep bad ruh halor ka Integrated Nutrient Management (INM) ban pynneh ïa ki kam rep kiba ai jingmyntoi shisha ïa ki nongrep ki jylla shatei lam mihngi ka ri India.
Lyngba kane ka prorkam, la wan ban shim bynta da ki riew shemphang ha ka kam rep ka kam riang ba kynthup ïa u Dr. Mahesh Pathak bad u Dr. Abhishek Gowda ha ryngkat ka Dr. Lala I.P. Ray kaba mihkhmat na ka School of Natural Resource Management kiba la batai bniah bha halor ki lad ban ïada ïa ki jingthung na ka jingshah bam khniang, ka jingpang ki jingthung, ka jingsboh ka khyndew bad ruh ban pynmih ïa ki mar rep kiba lah ban tei ïa ka met jong u briew.
Ha kane ka sngi kum shi bynta ban kyrshan ïa ki nongrep, la sam ruh ïa ki tiar ne ki mar rep ba pyndonkam ha ka kam rep ka kam riang bad kymjuh ruh ki symbai jhur bapher bapher lem bad ki kynja dawai ban sumar ïa ki jingthung khnang ba lait na ka jingshah pynjot ha ki khnaing ka ban long ka jingmyntoi ïa ki nongrep.
Ïa kane ka prokram ai jinghikai ne ka jingïathir hapdeng ki nongrep bad ki Scientist la kyrshan borbah da ka National Research Institute for Integrated Pest Management (NRIIPM), New Delhi lyngba ka projek ba la tip kum ka “Establishment of Crop-Based Model IPM Villages for Promotion of Integrated Pest Management Technologies ha ki jylla shatei lam mihngi ka ri India.