Nalor ba la pynkiew tulop ym don jinghun namar ki khlem pyrkhat na ka bynta kiwei

Shillong, Naitung 4 : Nalor ba ka sorkar ka la rai ban pynkiew tulop ïa ki nonghikai Lower Primary bad Upper Primary da 6 hajar tyngka bad 9 hajar ïa ki Higher Secondary bad nonghikai Science ha ki kyrdan UP bad Secondary bad kumjuh ruh iaki nonghikai Hindi bad 4th Teachers jongka SSA lait noh tang ka jingkyntiew tulop 5% man la u snem ba ka sorkar kam pat rai, hynrei kine ki nonghikai Adhoc ha ka lama FASTOM kim hun satia namar ki khlem pyrkhat ïa kiwei kiba ym ïoh tulop kum ki nonghikai SSA, ki nongtrei ka tnad ka koit ka khiah bad khamtam lei lei ki nongtrei ka MeECL.
Haba ïakren bad kiba bun ki riew rangbah bad ki riew pawkhmat ki la pynpaw ba ki nonghikai ki la dei ban pynsangeh shwa ïa ki jingïakhih haba ka sorkar ka la pynkiew tulop ïa ki bad sa ïakren biang bad ka sorkar hadien lada kim hun hynrei kane ka jingleh jongki kumne ka wanrah ka jingpynartatien ïa kiba bun ba lang ïoh don kaei re kaei sha lyndet kumba la kynnoh da u Symbud Myntri Rangbah ka jylla u bah Prestone Tynsong myn ha ka Sngi Thohdieng.
Na ka liang kine ki nonghikai ad-hoc kiba pynlong ïa ka jingïakhih da kaba shong kyllaiñ myngngor bad sahmiet la shitaïew kynthih ha ka 4 tarik Naitung kim shym la hun satia ïa ka rai kaba ka Kynhun Myntri ka shim rai ban kyntiew tulop ïa ki da 6 hajar ïa ki nonghikai Lower Primary bad Upper Primary bad 9 hajar ïa ki nonghikai Higher Secondary bad ki nonghikai Science ha ki kyrdan UP bad Secondary bad kumjuh ruh ïa ki nonghikai Hindi bad ki 4th Teachers jong ka SSA katba ïa ka jingkyntiew tulop da 5% man la u snem ka sorkar kam shem la shimrai eiei.
Haba kren ha ka jingïalang ba lyngkot ki nongïalam ka FASTOM ki la pynpaw ïa ka jingbym sngewhun satia ïa kaei kaba ka Kynhun Myntri ka rai namar kam ïadei satia tang marshiteng ruh na kaei kaba ki dawa. U Samla Mayborn Lyngdoh haba kren ha kane ka sngi u la ong ba kane ka rai jong ka sorkar ka long pynban kum ka jingshet kylla ïa ki namar dang shen u Symbud Myntri Rangbah ka jylla u la ïathuh sha ki lad pathai khubor ba ka sorkar ka la rai ban kyntiew ka jingpynlut da 200 klur na bynta ki nonghikai adhoc katba ha ka rai kaba ka Kynhun Myntri ka shim ka rai ban kyntiew tang da 100 klur ha ka shisnem ong u Samla Mayborn
Shuh shuh u Samla Mayborn ha ka jingkren u la ñiewtang ïa kaei kaba ka sorkar Congress hapoh ka jingïalam u Dr Mukul Sangma u la kyntiew da 100% ïa ka tulop jong ki nonghikai ha u snem 2016. U Samla Mayborn u la buh jingkylli ruh ïa ka sorkar ba kumno ha u 2015-16 mynba ka jylla ka don ka jingmang ka ka poi tang 13,000 hajar klur ka lah ban kyntiew da 100% katba ynda ka ka mang tyngka ka poi da 17,000 klur tam kam lah satia ban kyntiew kumba baroh ki nonghikai ki angnud.
`Haba kren pat halor ka jingrai ka sorkar ban kyntiew tulop ym 18 hajar ïa baroh ki nonghikai kumba ki dawa na ka liang u Samla Mayborn u ong ba kane ka jingleh jong ka sorkar ka dei thik kumba ka ju leh ka sorkar phareng mynba ka dang synshar ïa ka ri India ha kaba ka pharia bad synshar ban ïoh leh katba mon na ka jingbym don ka jingïatylli. Shuh shuh u la ong ba kumba ki nonghikai naduh ki kyrdan Primary haduh ki kyrdan Higher Secondary ki dawa lang bad ïakhih lang na ka liang jong u hi um sngewhun satia.
Haba ïadei pat bad ka jingïakhih la kin dang bteng ne ki sahngeh noh na ka liang jong ki nonghikai kim pat shym la shim rai eiei hynrei ki rai ban dang sahmiet ha kane ka miet sngi nyngkong bad kin sa shim pat ïa ka rai jong ki lashai ka 5 tarik Naitung bad ha kajuh hi ka jaka ha ka por 11 baje mynstep.