Nongstoiñ, Nailar, 2: Naduh ba sdang ka khang dam, ki nongbylla misteri bad kiwei kiwei ki kam bylla, ki la mad ïa ka jingeh kaba khraw, namar nalor ba la kyrduh bylla bad ym don shuh ba khot trei bylla, hynrei ka dor ka mur ki mar ki mata ruh ka la kiew sha ba palat. Kane ka jingkiew dor kaba la jia hapdeng kane ka khangdam, ka la pynlong ïa kiba bun ki nongbylla ban duh kam duh jam.
U Bah S.Nongphud uwei na ki nongtrei bylla misteri haba ïa kren bad u nongthoh khubor u la ong, “Na ka liang jong ngi kum ki nongbylla misteri ngi kyrpad ïa ka sorkar ba kan peit lem sha ki nongbylla, namar ba kumba long mynta ngi im ha ka jingeh jingjynjar, khamtam eh ka jingduhnong bad ka jingbym ïoh bylla. Ka jingeh ha kum kane ka por ka dei eh namar ka jingkiew dor palat jong ki mar ki mata lane ki mar bam. Hynrei, ki tiar shna ïing shna sem kum u nar ka cement, ka bai prek bad kiwei kiwei, ka la wanrah ïa ngi ki nongbylla trei bylla ban mad jingeh haduh katta katta”.
U Bah K.Thongni u la ong, “Kumba long mynta ka jingkiew dor ka la kot sha sanphew haduh hynriew phew tyngka. Kumta ka la ïapher bak ly bak na ka dor ba ju long baroh shikatta. Kumta ngi kyntu sha ki bor ba dei peit jong ka sorkar ba kin peit lem halor kane ka jingeh ba ngi ïakynduh. Ngi don hok ban tip la hato kane ka jingkiew dor ka dei ka jingshim kabu jong ki nongdie, lane hato ka la don ka jingpynmih dor thymmai da ki karkhana shna tiar”.
“Ka jingong jong ka sorkar ba ïa ki nongbylla sngi yn shah ba kin leit bylla. Hynrei lada ka dor ka mur jong ki tiar ki tar ka la kiew palat pud, kan myntoi aiu ïa ngi ki nongbylla. Dang ha u bnai Ïaiong ka dor jong u cement ba kham jem dor ka long 420 tyngka, hynrei mynta pat ka dor ka la poi haduh 460 tyngka. Haduh 40 tyngka la pynkiew dor, wat I malik kiba ai bylla ïa ngi ruh ki la ud hakhmat jong ngi ba la kiew lut ka bai tiar”.
U la ong ruh, “U nar shna ïing ba 16, 12 bad 10 dang ha u bnai Ïaiong ka dor ka long 56 tyngka shi kilo. Hynrei mynta pat naduh ba tieng corona bad sdang khang dam, la kiew dor kynsan. Kane ka pynpaw ha ngi ki nongbylla ba imat ka don kaei re kaei shalyndet. Kumta, lada ka sorkar kam peit lem kamut ba ka jingpyllait ïa ngi ki nongbylla ka long ka bym myntoi, namar ki trai kiba ai bylla ïa ngi ki ud ki nam namar ma ki ruh ki ïakynduh jingeh”.
U Bah S.Lyngdoh u la ong, “Naduh u snem ba la lah hi ngi mad ïa kane ka jingeh bad bun kiba ai daw ba dei na ki pulit bad ka jingshah bat shah pyndik ha lynti ba sa kiew ka dor ka mur jong ki tiar ki tar. Ban kynnoh ba tang ki dukan kiba shim kabu ruh ka bym lah ban long. Namarkata ka sorkar ka dei ban kit khlieh ba kam dei ban pyndik ne pynduh bylla ïa ngi ki nongbylla misteri”.
“Bun ki nongbylla ki bym ïoh bylla thikna don kiba ïoh tang ar sien shi taiew bad don ruh kiba shu shong ïing da ki taiew, tang na ka daw ba la rem palat ki mar ki mata. Nalor ka sorkar, ngi sngew ban kyntu ruh ïa ki sengbhalang ba kin peit lem halor kane ka jingeh jong ngi ki nongbylla, ban tuklar lem ba balei ha u snem 2020, ka jingkiew dor ka la long palat. Hynrei, mynta u snem ruh mar syn sdang ka khangdam, la kiew lut ka dor ka mur man ka sngi man ka taiew”.
“Ngi kyntu bad kyrpad ruh ïa ki nongmihkhmat paidbah kum ki MLA bad MDC lane kino kino ki seng kiba peit ïa ka bha ka miat, ba kin sngewbha ban phai khmat lem sha ngi ki nongbylla sngi. Bun na ngi kiba bylla myn sngi bad bam mynmiet, hynrei lada baroh ki tiar ki tar ki shu kiew dor lut, te hato kumno ngin leh mano shuh ban ai bylla ïa ngi khamtam eh ha kum kane ka por jong ka kordit”, u la ong.
