Nalor ba hap ïada ïa ka burom lahduh ha ka MSL, khreh ka Mawlai SC ban ïashim bynta ha ka I-League 3

Shillong, ïaïong 12: Ka Mawlai SC kan sa rung sha ka lympung phutbol national-level jong ki klob da kaba ïashim bynta ha ka I-League 3 2025-26 (ka lympung phutbol kyrdan ba saw ha ka phutbol jong ki shynrang ha ka ri), ka ban sdang ha kaba kut jong une u bnai.
Ha kane ka lympung ka Mawlai ka la shah kynthup ha ka Group A, ryngkat ka FC Raengdai (Manipur), ka Sikkim Brotherhood FC, ka Sunrise Club Orissa bad ka ARA FC (Gujarat). Baroh ki jingïalehkai jong kane ka Group yn pynlong ha Khuman Lampak Stadium ha Imphal.
Ka All India Football Federation ka la pyntreikam ïa ka I-League 3 ha u snem 2023 na ka bynta ki lahduh jong ki State League bapher bapher ha kylleng ka ri. Kane ka lynti kaba sdang ha ka kyrdan phutbol jong ka ri kaba ïalam sha ka I-League 2, ka Indian Football League bad shaduh ka kyrdan kaba ha khlieh duh, ka Indian Super League.
Na ka bynta ka Meghalaya, ki lahduh ha ka Meghalaya State League ki lah ban ïashim bynta ha ka I-League 3. Ka Rangdajied United (ka lahduh jong ka MSL 3) ka la ïakhun ha ka samoi 2023 hynrei kam shym la lah ban jam shakhmat palat ïa ka wat ïakhun group stage. Nangta ka Mawlai pat ka la rah ïa ka nam lahduh ha ka MSL 4.
Lah ban kdew ba ka Mawlai ka la long kaba khlaiñ bha ha kito ki por, ha kaba ka la rah arsien lynter ïa ka nam lahduh jong ka Shillong Premier League bad nangta sa ka nam lahduh jong ka MSL ha ka jylla baroh kawei.
Hynrei u snem 2025 u la long uba kham sniew, ha kaba ka kynhun ka la pyndep ha ka kyrdan kaba lai ha ka SPL bad ki la shah rem noh ha ka semifinal ha ka SSA Super Cup ba thymmai.
Ka kynhun kan thmu ruh ban ïada ïa ka nam lahduh jong ka MSL ynda la sdang ka samoi ïalehkai kaba san ha ka 15 tarik u ïaïong. Hynrei ka jingïakhun jong ki ha ka I-League 3 ka dei ban sdang ha ka 27 tarik u ïaïong bad kane ka lah ban wanrah jingeh ïa ka kynhun ban ïoh ïa ka por pynjahthait kaba biang katba ka dang pynleit jingmut ruh ïa ki jingïakhun ha ka MSL 5.