Nongpoh, Naitung 28: Ka kong Rona Khymdeit MDC ka Nongpoh mynta ka sngi kala leit ban kynduh kyrkieh ïa u Abhilash Baranwal Deputy Commissioner ka Ri-Bhoi District ban pynkhlaiñ ïaka jingpahara khamtam haki jaka khappud jong ka jylla kumba ka Ri-Bhoi ka dei ka district kaba tyngkhuh bad ki khappud jong ka Assam, hadien ba ka jylla Assam kala shim ïaka sienjam ban khynra lut ïaki mynder kiba sah beaiñ ha katei ka jylla.
Haba kren shaki lad pathai khubor hadien ka jingleit kynduh ïa u DC ka Ri-Bhoi naka liang ka kong Rona Khymdeit, haka jingdonlang u Bah Rayonald Kharkamni Working President ka NPP Nongpoh Block kala ong ba kum ka MDC ka dap da ka jingsngewkhia hadien ka sienjam bala shim da ka Assam ban khynra naphang ïaki mynder, namar kan long pynban ka jingma ïaka jylla jong ngi lada ngim long kiba peitngor bad ban shimkhia naduh ki nongïalam shnong bad ki bor district.
Kala ong ruh ba ka Ri-Bhoi District ka dei ka khyrdop ban rung sha ka jylla bad ban mih ruh naka jylla bad lada ngim shimkhia kan long ka jingma kaba khraw, namar bun ki khappud jong ka Ri-Bhoi District la kerkut lut da ka Assam naduh ki thaiñ Marmaiñ, Jirang, Khanapara bad lada ngim shimkhia kan long ka jingma ïaka shnong ka thaw, ka district bad ka jylla baroh kawei.
Kumta kum ka MDC kala buh ka jingkyntu ïaka bor district ban peitngor bad pynkhlaiñ ïaka jingpahara haki khappud ka jylla bad kumjuh ruh ki Rangbah Shnong, ki VDP ban shimkhia ba kan nym don kano kano ka jingrung beaiñ ki bar jylla sha ki shnong ki thaw.
Halor katei ka jingleit kynduh, naka liang u DC ka Ri-Bhoi u la kular ban shimkhia ban lum ruh da ka jingïalang naka bynta ban pyrkhat ïa katei ka mat kaba lah ban ktah ïaka jylla baroh kawei.
