Shillong, Nailar, 20: Ka Hynñiewtrep Achik National Movement (HANM), ka la buh jingkylli ïa ka Dhar Construction Limited , ba ka la ïoh jingbit neem ha shwuwa ba kan khlong maw narud ka Wah Umïam kaba ïaid lyngba na ka shnong Umlai-teng kaba ïaid terter shaduh ki shnong kiba sharum ha Ri Bhoi District.
Ki nongïalam jong ka HANM Ribhoi District hapoh ka jingïalam jong u Bah Bawan Nongsiej, ki la ïathuh ba ïa kane ka jingpynjulor jong kane ka kompeni ïa kane ka wah la ïoh jingtip hadien ba ki nongshong kane ka thaiñ ki la ujor sha ka seng da kabaa phah ruh da ka jingthoh ha kaba kiba la pynpaw ruh ïa ka jingduhnong jong ki na kane ka jingkhlong maw na ka wah Umïam.
Ha ka jingthoh ba la phah sha ka HANM, ki paidbah ki la ïathuh ba ki rud wah jong ka Wah Umïam ka la julor ha shilynter, bad ka um ruh la la jngut bad kim ïoh shuh ban pyndonkam ban sait jain bad ban sum ban sait.
Hadien ba la ïoh pdiang ïa ka jingujor na ki nongshong shnong, ka HANM ka la phah da ka jingthoh sha ka Dhar Construction Limited ban pan jingpynshai halor kane la ka la ïoh jingbit neem ban khlong maw na ka bynta ban pyntrei ïa ka surok.
