Shillong, Jylliew 01: U Myntri ka tnad Pule Puthi ka sorkar jylla, Rakkam A Sangma ha ka sngi Palei u la ong ba ïa ka National Education Policy (NEP) 2020 yn pyntreikam noh ha ka jylla naduh ka samoi pule jong u 2024-2025.
Haba kren bad ki lad pathai khubor, utei u Myntri u la ïathuh ba ki la don bun ki bor pynïaid skul kiba la kyrpad ïa ka sorkar jylla ban ym pyntreikam mardor ïa katei ka National Education Policy 2020.
“Ngi kwah ban pyntreikam noh ïa ka kham kloi hynrei naba bun ki bor pynïaid jong ki jaka pule ki kyrpad ïa ka sorkar ba kim pat long kiba pynkhreh na bynta ban pyntreikam ha kaen ka samoi 2023-24, hynrei ki la kyrpad pat ba ki la long kiba la pynkhreh na bynta ka samoi 2024-2025,” ong u Myntri.
La ïathuh ruh ba haduh myntau Myntri u la don shong jingïalang lai sien bad u Vice Chancellor ka NEHU, nangta ka Academic Council bad ki bor pynïaid jong ki jaka pule ka jylla ryngkat ki ophisar ka tnad pule puthi ban ïa kren halor katei ka bynta.
Shuh shuh u la ïathuh ruh ba ki la dep ban phah da ka shithi sha ki bor pynïaid skul hynne ka sngi bad ruh la shai ba la kumno kumno ha ka taiew ban wan kin sa pyntip shaphang ki jingeh bad ki ishu bad ruh haduh katno ki la pynkhreh na bynta kane. Bad dei ka tnad hi kaban shim ïa ka rai,” u la bynrap biang.
