Naduh u Naitung yn treikam ka BNNS ha jaka ka CrPC, ym treikam ha ki District Council Court

Shillong, Jylliew 19 : Ka Kynhun Myntri ha ka sngi Balang ka la mynjur ban pyntreikam noh ïa ka aiñ Bharatiya Nagarik Suraksha Sanhita, (BNSS) 2023, naduh ka 01 tarik Naitung mynta u snem, katkum ka jingbthah jong ka Sorkar ban bujli noh ïa ka Code of Criminal Procedures (CrPC).
Haba pyntip ïa kane ka rai, u Myntri ka tnad Social Welfare ka sorkar jylla, Bah Paul Lyngdoh u la ïathuh ba ïa kane ka rai ki la shim hadien ba ki la ïoh ïa ka jingbthah na ka sorkar India ban pyntreikam noh ïa ka BNSS naduh u Naitung mynta u snem.
“Kumta kine ki aiñ kam bymman kin sa treikam noh naduh ka 01 tarik Naitung, mynta u snem bad ka Sorkar Jylla ka dei ban pynmih jingpynbna ïa ka jingtreikam ka BNSS, 2023, bad ïa kane la mynjur da ka kynhun myntri” ong u Bah Paul.
Na ka liang u Secretary Law and Parliamentary Affairs jong ka Sorkar Jylla, Bah Cyril V Diengdoh (IAS), haba pynshai bniah halor kane u la ong ba ka long kaba donkam ban pyntreikam noh ïa ka BNSS khnang ba ki ïing Kashari kin lah ban pyntreikam noh da kane ka aiñ haba bishar ïa ki mukotduma kam runar, hadien ba la bujli ïa ka CrPC.
Da kaba pynshai bniah ba ka BNSS kan treikam noh ha baroh ki Kashari, u Bah Cyril u la ong ruh ba kane ka BNSS kan nym treikam ha ki Kashari jong ki Autonomous District Council kiba hap hapoh ka Sixth Schedule namar ki don la ki jong ki kyndon katkum ha ka para (4) bad para (5) ka Khyrnit ba Hynriew jong ka Riti Synshar ka Ri.
La ong ruh ba ka BNSS ka dei ka aiñ thymmai kaba mih bujli ha jaka ka CrPC, bad ka jingthmu ka long ba pyllait na ki jingkyllaiñ ki kyndon, ban pynkhlaiñ ïa ka jingtohkit ha ka bor ki pulit, ban pyntreikam ruh ïa ka aiñ hapoh ka por kaba buh khlem jingpynslem bad ban pyrkhing ïa ka jinglait mon kiba leh ïa ki kam sniew.
Ka Kynhun Myntri hakane ka sngi ka la mynjur ruh ïa ki jingbthah ban pyntreikam noh ïa ka Forensic Crime Scenes Investigation (FCSI) kaba ïadei bad kane ka aiñ BNSS. Katkum ka BNSS ka jingpynshitom ïa kiba leh kam sniew ba shyrkhei, ka jingshah set phatok kan long 7 snem shaneng.
Halor kane, u Bah Paul Lyngdoh u la ong ba ka sorkar kan buh ïa ka kali Forensic ha baroh ki distrik jong ka jylla, kaban leit tohkit haba don kano kano ka jingjia.
Katkum kane ka aiñ, ka kynhun jong ka Forensic kan leit ban tohkit markhmat ha ka jaka kaba jia ki jingjia ba shyrkhei.