Shillong, Rymphang 05 : U Myntri Rangbah ka Jylla Conrad K Sangma ha ka sngi Palei u la pyntip ba ka sorkar jylla kan hap ban pynlut haduh 800 klur tam man u snem na ka bynta ban pyntreikam ïa ka rukom siew tulop thymmai ïa ki 23,000 ngut ki nonghikai Adhoc bad SSA ha ka jylla kaban treikam naduh ka 01tarik Ïaiong, 2026.
“Ka jingpynlut na ka bynta ban pyntreikam ïa kane ka rukom siew kaba thymmai sha ki nonghikai kan poi sha ka 817 klur tyngka ha ka shisnem,” ong u Myntri Rangbah haba kren bad ki lad pathai khubor hadien ka jingïalang jong ka kynhun Myntri.
La ïathuh ruh ba ka jingpynkhreh na ka bynta kane ka la ïaid shakhmat bad kan shimpor kumba 60 sngi ei ei na ka bynta ban ïoh pynurlong noh ïa ka kumba la buh kata naduh ka 01tarik Ïaiong mynta u snem.
