Naduh u bnai Ïaïong yn pynjur ka FASToM ïa ki jingïakhih ba shu mynthi ka Sorkar

Shillong, Lber, 23: Ki nonghikai skul Adhoc kiba dap da ka jingbitar ïa ka jingleh mynthi jong ka Sorkar Meghalaya Democratic Alliance (MDA) halor ka jingdawa ban kyntiew kyrdan Deficit bad ban pynkiew ïa ka tulop, ha ka sngi Balang ki la bteng ïa ka jingïakhih da kaba shong kyllaiñ myngngor hakhmat ka ophis treikam jong ka Meghalaya Board of School Education (MBoSE).
Ki nonghikai Adhoc kiba don hapoh ka shatri jong ka Federation of All School Teachers of Meghalaya (FASToM) ki la bteng ban pynjur ïa ka jingïakhih ha baroh kawei ka jylla naduh u bnai Ïaïong da kaba sdang ïa ka jingïashong kyllaiñ myngngor kaba san ngut shi sngi naduh mynta ka sngi.
U Executive Member ka FASToM u Samla Mayborn Lyngdoh ha ka jingïakren bad u nongthoh khubor u la ong, “ngin ap ïa ka jubab jong ka Sorkar haduh kaba kut mynta u bnai hynrei lym kumta ngin pynjur ïa ka jingïakhih ha baroh kawei ka jylla naduh u bnai Ïaïong.”
U la ong ba wat hapdeng ki jingkular jong ka Sorkar, ka jingpynkiew tulop ïa ki nonghikai skul Adhoc ka la long naduh u snem 2016 mynba u Mukul Sangma u dang long u Myntri Rangbah ka Jylla.
Kane ka jingïakhih jong ki nonghikai skul Adhoc ka la sdang naduh ka lah sngi u Blei da ka jingïalang paidbah ha madan Malki bad pynbud pat sa ha ka sngi Baar ïa ka jingïaid paidbah kaba tang 20 ngut katkum ka jingai jingbit jong ki bor synshar ka East Khasi Hills District.
Ki nongïalam jong ka All India Trinamool Congress (AITC) ki la pynrem jur ïa kane ka jingleh mynthi jong ka Sorkar MDA ïa ka jingdawa jong ki nonghikai skul Adhoc.
U President ka AITC u Bah Charles Pyngrope u la ong, “ka Sorkar ka dei ban kham phaikhmat ban kyntiew ïa ka jingsiew tulop sha ki nonghikai ha ka jaka ban pynkiew tulop ïa ki Nongmihkhmat paidbah.”
U Bah Pyngrope u la ong ba ka Jylla ka dei ban don ïa ka kynhun kaba lah ban ai jingmut ïa ka Sorkar kumno ban kyntiew ïa ka jingïohlum khajna khnang ba kan ym buh jingma ïa ka jingim jong ki nongshong shnong lane jong ka mariang.
“Hynrei kumba ka paw, la i kumba ka Sorkar Jylla kam don jingmut satia ban weng ïa kine ki jingeh jong ki nonghikai,” u la ong.
Ha u snem 2021, u Myntri ka tnat Kam Pohing, u Bah Lahkmen Rymbui u la kren sha ki lad pathai khubor ba ka jingpynkiew ïa ka tulop ki nonghikai skul Adhoc kam lah satia ban ïaryngkat bad ki nonghikai skul Sorkar namarba ka Sorkar kan hap ban bei ïa ka jinglut kaba kot sa T. 251 klur.