Naduh u 2015 khlem wan trei u Headmaster ka skul Mon Rongsna, hynrei shim pat ka tulop

By Mawphor Editor On Dec 9, 2025

Shillong, Nohprah 08: U nongtrei monsngewbha (social activist) u la khot ba dei ban wengnoh ïa u headmaster jong ka Mon Rongsna Government Lower Primary School ha South Garo Hills, da kaba kynnoh ba u la leh bym suitñiew ïa la ki kamram naduh u snem 2015 kaba la lam sha ka jingpep skul noh shiteng por jong ki 20 ngut ki khynnah skul.
U Greneth M Sangma u la thoh sha Sub Divisional School Education Officer, South Garo Hills, ban dawa shim kam pyrshah ïa u headmaster Headring M. Marak
“U la leh bym suitñiew ïa ki jingkitkhlieh jong u, da kaba shu jah beit napoh ka skul, bad u la shim pat ïa ka tulop la da ki phew snem,” kynnoh u Sangma ha ka shithi.
Katkum u Sangma, ki la don bun ki jingujor kiba la phah pyrshah ïa u Marak, ba kynthup ka jingai ïa ka RTI bad ka jingpynsangeh kam kaba la pynbud pat sa da ka jingthungkam biang hynrei kane ka khlem wanrah ka jingkylla ha ka jinglong jong u.
Ka managing school committee, ki paidbah, bad ki nongïalam ki shnong ki la pynskhem ba u Marak u khlem wan sha skul naduh u snem 2015 haduh u snem 2025 bad la siew tulop pat ïa u, wat hapdeng ka jingjah rngai jong u na ka kam.
“Ka managing committee ka la aiti ki jingujor la bunsien mynshwa, bad ki la pynpaw ïa ka jingbym sngewkmen halor ki jingbym shim kam pyrshah ïa u Headring M. Marak,” ong u Sangma. U la kynnoh ba kane ka jingbym poi jong u sha ka kamram ka la lam sha ka jingpep skul noh shiteng por jong ki 20 ngut ki khynnah skul bad kane ka la pynjulor ïa ka lawei jong ki.
U Sangma u la dawa ba dei ban wengkam noh mardor na ka kam ïa u Marak, bad dei ban thungnoh da kiwei ki nonghikai kiba la tbit bad ba dei ban shimkam pyrshah ïa u Sub Inspector of Schools ba u la pulom ban pyndep ïa ka kamram bad ka bamsap bad ba dei ruh ban pynlong ka jingtohkit kaba bniah halor kane ka kam kaba la pynlehraiñ.
Ha ka shithi la kynthup ruh bad ka jingkyrpad ba dei ban wengkam noh hapoh 15 sngi kaba long katkum ki kyndon ka pule puthi bad ka government service rules.