Naduh u 1993 sdang ka jingsam khusnam ka KSU sha ki samla pule: Education Secretary

Jowai, Risaw 18 : U Samla Pynkmenlang Sanmiet uba dei ruh u Education Secretary ka Khasi Students’ Union (KSU) CEC ula ong “ïa ka jingsam khusnam sha ki samla pule ka jaitbynriew la leh lyngba ka sengkmie naduh u snem 1993”, hynrei katba dang ïaid ka por la hap ban bhah noh sha ki shnat treikam ba kin leh ïa kaba donkam.
Ïa kane u samla Pynkmenlang ula kren haka jingïalang pynkup burom ne ka ‘Maitshaphrang Academic Award-2025’ ïaki 13 ngut ki samla pule kiba la wan hakhmat eh haka (SSLC & HSSLC) bala pynlong daka Khasi Students’ Union (KSU) Jowai Unit bad ka Thadmuthlong Pyllun Unit mynta ka sngi saitjaiñ 18 tarik Risaw ha Lumpyrtuh Community Hall Mihmyntdu West Jaiñtia Hills District, kum ka dak ban pynshlur ïa ki samla pule ka thaiñ.
‘Kaba sngewtynnad shuh shuh ka long ba ka sorkar kala bud ïa kane ha ki snem 2000, ban ithuh ïa ki samla kiba la pass bha shakhmat bad mynta ki samla jong ka jaitbynriew kila nangbun kiba la pass haki kyrdan bapher bapher. Ka KSU ka thrang bad angnud bha ban ïohi da ki samla trai jylla ban don haki shuki treikam kiba halor khamtam eh haki ophis treikam bapher bapher hapoh ka jylla’, la ong u samla Pynkmenlang.
Ha kane ka sngi ïaka jingïalang pynkup burom la pynïaid da u samla Nidapoi Shadap General Secretary ka Jowai Unit, La ïoh ruh ka jingkren kitbok kitrwiang ïaki samla pule da u samla Ewanmi Phawa President Jowai Unit, u samla Conard R. Sana Education Secretary Jowai Circle, samla Laitphar Syngkrem President WJHD bad kumjuh naka symbud kongsan kaba dei ka District School Education Officer ka WJHD ka Dr. W. Sumer.
Na ka liang ka Dr. W. Sumer haba ai jingkren kala ong kane ka dei tang ka jingsdang ïa kitei ki samla pule, da kaba ong ruh ‘ym lah ban len mynta u snem ka Percentage jong ka jingpass ki samla pule ka jylla kala kiew bha haba ïanujor bad ki snem bala dep, hynrei kaba donkam mynta ka long ban pynïoh shuh shuh ïa ka jingbha ha ka pule puthi jong ki samla pule’.
Kala ong ruh kum ki samla pule ki dei ban ieit shwa ïalade bad ban don ka jingkitkhlieh halade namar mynta ki don shibun ki jingeh baki samla pule ki lah ban ïakynduh khamtam haka jingmut jingpyrkhat, kum ki samla pule ki dei ban long kiba ïar bha haka pyrkhat pyrdaiñ, da kaba ka ai khublei ruh ïa ka KSU kaba la ai mynsiem ïa ki samla pule naka por sha ka por.
La ïadonlang ha kane ka sngi da ki kmie ki kpa jong ki samla pule, ki dkhot bad nongïalam ka seng nalor kiwei de, la pynphuh ïa kane ka sngi da ki jingshad tynrai na ki samla ka Thadmuthlong Unit, katba ïa ki kyntien ai khublei la ïoh na u Overjoy Kanai, u Publicity Secretary ka Thadmuthlong Unit.