Shillong, Nailar 18 : Watla ka elekshon MLA ka dang sah sa kumba arsnem tam hynrei na ka liang ki longkmie NPP hapoh ka lama jong ka National People Women Front (NPWF) ki la pynkhreh shaid shaid mynta da kaba sdang ban lum lut ïa ki nongïalam na baroh ki distrik jong ka jylla baroh kawei.
Kum ka jingsdang, na ka liang ka NPWF hapoh ka jingïalam jong ka President Kong Grace Kharpuri ba dei ruh ka MDC jong ka Nongshken, ha ka sngi Nyngkong ka la lum ïa ki nongkitkam na kylleng ki bynta jong ka jylla sha ka jingïalang kaba nyngkong eh jong ka party ha ryngkat ka jingdonlang ki nongïalam ba rangbah jong ka party kynthup naduh u Working President Bah Hamlet Dohling, Nongaiktien ka Party Bah HM Shangpliang, nangta u General Secretary Organisation Prof Don War nalor kiwei kiwei.
Ïa kane ka jingïalang jong ka NPWF la pynlong ha Conference hall jong ka ophis National People Party, ha kaba baroh ki nongïalam jong ki longkmie na kylleng ki District jong ka jylla kila wan ban ïa shim bynta ha kane ka jingïalang. Ha ka jingïalang la kyntu ruh ïa ki nongïalam ba kin jied noh ïa ki President bad ki Secretary ha man la ki District bad kumjuh ruh ha Block khnang ba ka party kan lah ban pyntyllun noh shaid shaid ïa ka kam shakhmat.
Nangta la ong ruh ba hadien ba la dep ban thaw ne ïoh ïa ki nongkitkam ha ki District bad ki Block, ki nongïalam ka NPWF kin leit sha man la ki District bad ki Block ban ïa kynduh ïa ki nongkitkam bad kumjuh ruh ïa ki nongkyrshan jong ka Party khnang ban wanrah ka jingiadei kaba ïajan.
Ka NPWF kila bthah ruh ïa baroh ba kynthup lang na ri lum Garo bad na ri lum Khasi-Jaintia ba kin hap ban phah noh ïa ka kaiphod ha shwa ka 05 tarik u Nailur, khnang ba ka party kan ïoh ban pynkhreh ban pdiang burom ïa ki ha ka 12 tarik u Nailur sha ka NPWF.
Na ka liang ka President jong ka State National People Women Front, Kong Grace Kharpuri haba kren ha ka jingïalang ka la ong ba ka thong ba hakhmat eh ka long ban pynkhlain ïa ka jingtreikam jong ki longkmie ha baroh ki bynta jong ka jylla khnang ba kan long ka jingpynkhreh lypa na ka bynta ka elekshon MLA ha u 2028.
