Naduh kad-liengsuiñ haduh madan Polo mih ki paidbah ban pynkup burom ïa u Steve Jyrwa

Shillong, Naiwieng 19 : Ka nongbah Shillong ha ka janmiet sngi Ba-ar ka la shongshit lut hadien ba u lahduh ha ka lympung ïakob shad jong ka India Best Dancer Season 4, u Steve Jyrwa u la wan ban ai khublei hi markhmat ïa ki nongkyrshan ha ka jingïalang kaba la pynlong ha madan Polo. U Steve u la mih dang step na nongbah Mumbai ban wan sha Shillong bad naduh kad-liengsuiñ Guwahati ki paidbah ki paidbah ki la mih ban ai khublei bad pynkup burom ïa u.
Ynda la poi ha Mawiong, ISBT ruh ki paidbah kynthup ïa u MDC ka Mawlai, Bah Teibor Pathaw ryngkat ki nongïalam jong ka Mawlai Social Service Organisation (MSSO) ki la mih lang khrui ban pynkup burom. Na ka liang u MDC u la pyndeng da u Paila ryngkat ka ryndia kum ka dak ka jingai burom na ka bynta katei ka nam kaba u la wanrah ym tang ïa ka nongbah Shillong hynrei ïa ka jylla hi baroh kawei.
Hadien kane pat beit beit u la leit sha la iing sah kaba don ha Nongmensong bad nangne pat sa sha Iing u Lat ban kynduh kum ka burom.
Na ka liang u Lat ka jylla Meghalaya u CH Vijayashankar mar ia poi u pynkup burom ïa une u samla kum ka jingithuh ia katei ka jingjop jong u.
Ha kane ka jingpynkup burom na ka liang u Lat u la ai khublei ïa u Steve Jyrwa halor kane ka jingjop jong u, ha kaba kane ka la wanrah ïa ka burom, ka jingithuh bad ka jingsarong ïa ka jylla Meghalaya hapoh ka ri. Na ka liang u Lat u la pynkup burom ïa u da ka Raj Bhavan Memento bad Khasi Rindia.
Dei ynda la mih na iing u Lat ba utei u samla u la leit pat ban ai khublei ïa ki paidbah ha ka lympung kaba la pynbit pynbiang da ka All Meghalaya Dancers Assocïation hapoh ka jingïalam jong u Bah Kitbok Thabah bad ka kynhun ryngkat ka jingïatrei bad ki bahaiing.
Ha kane ka janmiet, ki kynhun bad ki seng bapher bapher kynthup ïa ki nongmihkhmat na katei ka thain, kata u Bah AL Hek ba dei MLA bad Myntri Sorkar kumjuh u Bah Pynshngain N Syiem ba dei u MDC bad Deputy CEM ka KHADC ki la poi lang ban ïa kmen bad risa lang halor katei ka jingïoh jong u Steve ban khur ïa ka nam kaba khraw tam ha ka lympung ïakob shad ha ka Ri.