Shillong, Naiwieng 06 : Ki bor pynïaid distrik jong ka East Khasi Hills ki la pynbna ban khang noh shipor ïa ka surok ha Upper Shillong namar ba dang ïaid ka jingpom surok hajan Rhododendron Trek Road bad hajan ka skul Gorkha kaba don harum 3Mer, Upper Shillong.
Katkum ka jingïathuh jong u Superintendent of Police ka East Khasi Hills, Bah Vivek Syiem la ïathuh ba ïa kane ka surok yn khang ban ïaid ki kali naduh ka por 11:00 baje mynmiet jong ka 08 tarik Naiwieng 2025, haduh ka por 5:00 baje mynstep jong ka 09 tarik Naiwieng, 2025.
Ha kine ka por, la bthah ïa ki nongleit nongwan ba kin ïaid da kawei pat ka lynti na Laitkor – Pomlakrai sha 5 Mer, Upper Shillong bad kane kan long kumjuh na ka bynta kito kiba thmu ban kiew sha nongbah Shillong.
La pyntip ruh ba ïa kane ka surok yn khang na ka bynta ki kali kiba heh ban ïaid ha ka por mynsngi ha ka 09tarik Naiwieng, 2025. Tangba la pyntip pat ba yn ïarap ïa ki kali kiba donkam kyrkieh kum ha ka pang ka shitom ban ïaid na kane ka surok.
Na ka liang ki bor bahalor ki kyntu ïa ki paidbah ba kin ïai shah lang bad ban pynkhreh ïa ka leit ka wan jong ki ha kine ki por ba don ka jingkhang surok.
