Naduh ka kam President bad Genl. Secretary lem bad 8 tylli ki pat, yn jied nongkitkam ba thymmai ka KSU

Shillong, Ïaiong 03: U President barim jong ka Khasi Students’ Union uba la kylla long mynta kum u Secretary jong ka Election Committee u Bah Samuel B Jyrwa u la pyntip ba ha ka election ba 16 jong ka Central Executive Council (CEC) jong ka samoi treikam 2026-2029 kin don haduh 10 tylli ki post.
Katkum ka kyrwoh khubor u Bah Samuel u la pyntip ba kine ki post ki kynthup naduh ka post President, Vice President, General Secretary, Assistant General Secretary, Organising Secretary, Education Secretary, Information & Publicity Secretary, Sports & Cultural Secretary, Environment Secretary bad Office Secretary.
Ki nomination forms na ka bynta ka election ba 16 jong ka Central Executive Council jong ka samoi treikam 2026-2029 kin don ha ophis naduh lashai ka sngi kata ka 4 tarik u Ïaiong 2026.
Shuh shuh ka Election Committee ka la bthah ïa baroh ki tnad treikam ban ym pynthymmai nongkitkam lane pynkha tnad treikam tad haduh da la dep ka election ha ka 9 tarik u Jymmang 2026.
Ka Election Committee ka la pynkut noh ïa ka CEC 2023-2026 bad ha ka jaka jong ka la thung da ka Caretaker Body ha kaba ki dkhot ka CEC hi kin long ki dkhot kane ka Caretaker Body. U President bad u General Secretary ka CEC 2023-2026 kin long ki Caretaker President bad Caretaker General Secretary.
U Secretary ka Election Committee u la pyntip ba ka tarik ba khatduh ban sam ïa ki nomination form kan dei la 13 tarik u Ïaiong 2026 bad ka tarik ba khatduh ban weng ïa la ka nomination form kan dei 14 tarik u Ïaiong 2026.
Ka jingbishar lane scrutiny ïa ki kyrtong bad ki nomination form kan long la 15 tarik u Ïaiong 2026 naduh ka por 1 baje nohphai sngi, la pyntip u Bah Samuel B Jyrwa.