Jowai, Jylliew 17: Ka jingpyndonkam ïa ki pla plastic bad kiwei de ki jait tiar plastic kiba tang shisien pyndonkam yn khang noh naduh ka ka 1 tarik u Naitung 2022 iathuh ka khubor ba la pyllait da u Deputy Commissioner jong ka West Jaiñtia Hills District mynta ka sngi.
Ki jait tiar plastic kiba la khang ban pyndonkam ki kynthup ïa ki jingpynkhuid shkor, ki balun, ki lama plastic, ki jingbat mit mit, ki jingbat ice cream ki thermocol kiba pyndon kam ha ka jing pynriam pynbeit.
La khang ruh ban pyndonkam ïa ki plate plastic, ki pela ki siang plastic, ki tari, ki pipe jingdih, ki jingsong, ki synduk thep bam thiang, ki invitation card, ki jingsong sikret bad kiwei kiwei kynthup ruh ïa ki PVC banner kiba duna ïa ka 100 micron.
Na ka liang jong u DC ula bthah ruh ïa u CEO jong ka Jowai Municipal Board, ki Inspector ka tnad Supply bad baroh ki BDO ban pynlong ïa ka jingai jinghikai pynsngewthuh sha ki paidbah halor ka jingsniew kaba mih na ka jingpyndonkam ïa ki tiar plastic.
Ha kajuh ka por u DC ula kyntu ruh ïa ki paidbah ba kin kiar na kane jingpyndonkam ïa ki plastic kiba pyndonkam tang shisien bad ruh ban don ka jingïatrei lang bad ki bor pynïaid District khnang ba yn lah ban pynduh syndon ïa ka jingpyndonkam ïa ki tiar plastic napoh jong ka District.
Lyngba kane ka hukum na ka liang jong u DC ula aibor ruh ïa ki ophisar sorkar ban pynlong ïa ka jingkhynra ïa ki dukan ha kano kano ka por khnang ba yn lah ban pynsangeh shi syndon ïa ka jingpyndonkam ïa ki kynja plastic ha ka District.
