Shillong, Naitung 19 : Ka lympung marathon kaba lai kaba heh tam ba pynlong ha ka jylla ba tip kum ka Sohra International Half Marathon 2024 kan long ha ka 21 tarik u Nailur ha kaba la khmih ba kin don bun bha kiba wan ban shim bynta ha katei ka lympung mynta ka kynti.
Ïa kane ka jingïakob kaba la ïoh ïa ka jingithuh da ka Athletics Federation of India (AFI), la pynlong lang da ka Meghalaya Athletics Association bad ka Meghalaya State Olympic Association ryngkat ka jingïatreilang bad ka Directorate of Sports and Youth Affairs.
Haba ïakren bad ki nongthoh khubor ha kane ka sngi Thohdieng u working president ka MSOA, Bah John F. Kharshiing u la pyntip ba ki nongmareh na kylleng ka ri, kynthup na Japan, ki la pynpaw ïa ka jingkwah ban ïashim bynta ha kane ka jingïakob mareh.
U la ong ruh ba ka Sohra International Half Marathon nalor ba ka dei ka jingïalehkai kaba kongsan bha na ka bynta ka jylla, kan kyntiew ruh ïa ka kam jngohkai pyrthei ha Sohra, ka jaka kaba ym pat tip da kiba bun.
U Bah John u la pyntip ruh ba ka tarik ba khatduh ban rung ban ïashim bynta ha kane ka jingïalang la buh ba kan long ha ka 10 tarik u Nailur.
Ki kyrdan bapher bapher jong ka Sohra International Half Marathon 2024 ki kynthup ïa ka 21K Elite Open (18snem shalor Shynrang & Kynthei), 21K Open (18snem shaneng), 10K Open (40snem haduh hapoh 50snem), 10K Open (50snem haduh hapoh 60snem),10K Open (50snem haduh 60snem), 10K Veteran ïa kiba palat 60 snem bad 5K Run na ka bynta kiba kwah ban mareh sngewtynnad (Shynrang & Kynthei).
La pyntip ruh ba ka bai rejistar na ka bynta ka 21K Elite Open (18 snem shaneng) bad 21K Open (18 snem shaneng) ka long 1000 tyngka. Ka jingpynrung kyrteng na ka bynta ka 10K Open (40snem haduh 50snem) bad 10K Open (50 haduh 60snem) kan long 200 tyngka. Shuh shuh la pyntip ba kam donkam bai rung satia na bynta kito kiba wan ban mareh sngewbha ha ka 5K.
Ha kajuh ka por, u director ka Sports and Youth Affairs u DD Shira u la pyntip ba ka tnad jngoh kai pyrthei nalor kiwei pat ki tnad line kin don bynta pura ha kaban pynlong ïa kane ka jingïakob mynta u snem.
Related Posts
U la pyntip shuh shuh ba ka tnad ka la mang pisa kaba 2.03 klur tyngka na ka bynta ka Sohra International Half Marathon mynta u snem.
Katkum ka jingong jong u, kin thung ïa ki ophisar na ki district bapher bapher ban mihkhmat ïa ki committee bapher bapher ha kaba pynlong ïa kane ka jingïalang.
Ha kajuh ka por, u general secretary ka MSOA, u Finely Pariat u la pyntip ba ka lynti ïaid na ka bynta kane ka jingïalang mynta u snem kan long kumjuh kumba la dep. Kane ka jingïamareh kan sdang na Laitsohpliah (6km shakhmat na ka jingkieng Mawkdok) bad kan kut ha Mawsmai (Nohsngithiang Falls viewpoint).
U la pyntip ba ka khusnam na ka bynta ka 21k elite open category na ka bynta ki 18 snem shaneng kan long naduh T.1 lak haduh T.1.50 lak na ka bynta ki nongjop ba nyngkong. Katkum ka jingïathuh jong u, ka khusnam baroh na ka bynta kane ka jingïalehkai mynta u snem ka long T.14.60 lak tyngka.
U la pyntip ba ki la rai ruh ban pynrung shuh shuh ïa ki kyrdan hadien ka jingkyrpad na ki nongmareh na ka thaiñ kiba kynthup ïa ka kyrdan 40 haduh hapoh 50 snem bad ka jingïamareh 10k marathon na ka bynta ka kyrdan 60 snem shaneng.
La pyntip ruh ba na bynta ka thup ba 21k bad 10k ka dei ka jingïalehkai kaba plie na ka bynta ki nongïalehkai marathon na ka jylla, na ka ri bad nabar ri.
U Bah Pariat u la ong ruh ba ki nongmareh marathon kim lah ban pynrung kyrteng bad ban ïashim bynta ha ki ar tylli ki jingïalehkai.
Haba pyntip ba ka jingrejistar na ka bynta ban mareh sngewtynnad ka long online & offline, u general secretary ka MSOA u la pyntip ba ka jaka pynrung kyrteng ka dei ka Ophis jong ka MSOA kaba don ha JN Stadium & Sohra Shop hajan Petrol Pump, Lad Thanad.