Nongpoh, Jylliew 22: Watla ka jingtei ïaka Entry Point ha Umling kaba dei ruh ka jingdawa jong kiba bun ki sengbhalang haka jylla kala urlong ban peit pyrman bad tehlakam ïaki bar jylla kiba rung sha ka jylla bala plie paidbah ruh ïaka ha u snem 2020 ha Umling, kumba ki sengbhalang haka jylla kila ïai dawa ruh sha ka sorkar ban pyntreikam ïaka Inner Line Permit ban khanglad ïaki bar jylla ban rung laitlan katba mon sha ka jylla, hynrei katei ka jaka ban talasi ïaki mynder kala shu long tang shipor tang kum ka jaka ban peitbñiah haka por ka jingpur sted ka khlam Covid-19, bad naduh ba kut katei ka khlam Covid-19 katei ka Entry Point bala mang ban talasi ïaki mynder ba rung shaka jylla kala khang tala syndon bad khyrdep noh.
Kum ban pynkynmaw, kane ka jingthmu ka sorkar jylla ban pyntreikam noh ïa ka entry point kaba don ha Umling, ka dei ruh ki mat jingdawa ki sengbhalang bapher bapher haka jylla ha kaba kine ki seng haduh mynta ki dang dawa ruh ban pyntreikam ïa ka Inner Line Permit kum ka thong ban khanglad na ka jingwan rung beaiñ ki briew kiba na shabar ka jylla, ha kaba u Bah Prestone Tynsong kum u symbud Myntri Rangbah u ba la plie ïa katei ka Entry Point u la kren shai ruh ba ka jingplie ïa katei ka Entry Point bad Facilitation Center ka dei tang ka jingsdang jong ka sorkar ban pyntreikam watla ki dang don shibun ki jingduna hynrei naka liang ka sorkar ka kloi ban pdiang ïaki jingai jingmut ban pynbha shuh ïa katei ka khyrdop khnang ban dang pynsuk ïaki paidbah ba leit ba wan, bad ba ki briew ba wan nabar kim dei ban don kano kano ka jingtieng ha ba ki rung sha ka jylla, hynrei donkam tang ba kin register ïalade bad ban pynbiang ïaki kot ki slaba donkam.
Hynrei katei ka Entry Point ha Umling la shu thaw ïaka tang ka jaka ban tehlakam bad peit pyrman ïaki bar jylla haka por ba jur bha ka khlam Covid-19, katba mynta la shu khang khyrdep ïaka khlem don briew shuh kiba trei ha katei ka jaka ha kaba ka jingrung jong ki bar jylla kala long biang kumjuh watla ka don ka Infiltration Check Gate ha Byrnihat hynrei ki sengbhalang naka por shaka por ki ju ïoh bat ïaki bar jylla kiba rung sha ka jylla khlem ki kot ki sla kiba biang ban pynshisha ba ki dei ki nongshong shnong jong ka ri India bad kaei ka jingthmu jong ki ban rung sha ka jylla.
Halor katei ka jingkhang khyrdep noh ka Entry Point ha Umling naka liang ka CoRP Central Body ruh hynnin ka sngi hapoh ka jingïalam jong u Bah Bandari Ryntathiang kum u President kala leit ban jurip ïa katei ka jaka namar ka jingbun jong ki bar jylla kiba rung khlem kot khlem sla, bad pan ruh ka jingpynshai naka sorkar balei ba khang ïa katei ka Entry Point ha Umling, bad haduh mynta ka ILP bala ju iai dawa da ki sengbhalang kam pat urlong watla ka kynhun jong ki nongmihkhmat haka jylla kila ai rai ban kyrshan ïaka ILP ha iing Dorbar thawaiñ ka jylla ha u snem 2019, hynrei haduh mynta katei ka jingdawa kam pat urlong.
