Shillong, Jylliew, 15: Ki nongtrei jong ka MCCL kiba don hapoh ka shatri jong ka Mawmluh Cherra Cement Employee’s Union (MCCEU) kiba la bteng ïa ka jingïakhih kaba khlem pud sngi mynta ka sngi Balang ki la ïoh ïa ka jingkyrshan na ki nongïalam barim kiba la buh jingkylli ïa ki rukom treikam jong ka Sorkar.
U Bah Wellborn Bynnud, uba bat mynshuwa kum u Vice President jong ka Union u la buh jingkylli halor ka jingkhang ïa kane ka karkhana namar ka jingduhnong bad ba ka Sorkar kam lah ban pynkhie im shuh, da kaba dkew ba kiwei ki projek kum ka jinghap ka jingtap tnum Ïingdorbar, ka jinghiar ka jingkieng ha Mawlai bad ka jingjreiñ um jong ka Inter State Bus Terminus (ISBT) ruh ki pynduhnong ïa ka Sorkar.
U la buh jingkylli ïa ka Sorkar hato yn khang ne pynsangeh ïa ki ruh.
U Bah Bynnud u la pynpaw ruh ba ka Sorkar Jylla kam dei ban ran dien na kaba bei tyngka ïa ka karkhana pynmih dewbilat ba pawnam bad kaba la rim bha ha Sohra, ka Mawmluh Cherra Cement Limited (MCCL) watla kan long 1000 klur tyngka ruh.
U la kyntu ïa ka Sorkar ba kan shim khia mardor ïa ki jingdawa jong ki nongtrei namar kumba long mynta naduh ba la khang ïa kane ka karkhana, ki nongtrei ki la mad jingeh bad ym biang shuh ha ka ïoh ka kot ne ki rukom im ba man ka sngi jong ki.
Halor ka jingtyrwa ban wanrah da ka Joint Venture na ka bynta ban pynim biang ïa ka MCCL, u la ong ba ka lawei na ka bynta ki nongtrei kam long shuh kaba thikna bad ym lah ban ong la ka Sorkar ka la ïakren neem ïa kane ka mat khnang ba ki nongtrei kin dang neh ha ka kam.
