SHILLONG, Risaw 24: Ka Shillong Sports Association ka la pynbna ïa ka prokram ïalehkai jong ka Super Cup 2025, ka lympung na ka bynta ki hynriew tylli ki kynhun ba kynsai tam jong ka Shillong Premier League 2025 kaba dang shu kut shen ha ka sngi Nyngkong.
Kumba ka paw, ka lahduh jong ka SPL 2025 ka Langsning FC, ka Shillong Lajong FC, ka Mawlai SC, ka Nangkiew Irat SC, ka Rangdajied United FC bad ka Sawmer SC, kidei ki hynriew tylli ki kynhun kiba la pynthikna ïa ka jaka ha kane ka lympung da kaba pyndep ha ka thup kyrdan Top-6 ha ka SPL mynta u snem.
Katkum ka prokram, ka Langsning FC (lahduh jong ka SPL 2025) bad ka Shillong Lajong (kaba wan baar) ki la ïohrung lypa sha ka semi final, katba ki saw tylli kiwei pat ki kynhun kin hap ban ïaknieh ha ka Quarter final.
Ka Quarter final jong ki saw kynhun kan long ha ka 31 tarik Risaw, 2025, ha kaba ka Nangkiew Irat SC kan aireng pyrshah ïa ka Rangdajied United FC, nangta ka Mawlai SC pyrshah ïa ka Sawmer SC ha ka 01 tarik Naiwieng.
ïa ka semi final la buh ban pynlong ha ka 07 bad 08 tarik Naiwieng, ha kaba ka Langsning kan aireng pyrshah ïa ka nongjop napdeng ka Nangkiew Irat lane ka Rangdajied United, katba ka Shillong Lajong pyrshah ïa ka Mawlai lane ka Sawmer.
Ka final kan long ha ka 13 tarik Naiwieng. Baroh ar tylli ki jingïakhun kin sdang ha ka por 5 baje janmiet ha madan First Ground-SSA Stadium, Polo.
