Naduh 22 tarik pyntikna ka sorkar ban kylluid war ka Khyndailad, hap ïoh pass ki kali ban ïaid

Shillong, Naitung 07 : Ka sorkar jylla ka la buh da ka thong ba naduh ka 22tarik ka Khyndailad kaba dei ka pdeng jong ka nongbah Shillong kan sa kylluid noh war namar shwa kane ka sngi kin sa pynkynriah noh sha kawei pat ka jaka ïa ki nongdie madan.
Halor kane, u Myntri ka tnad Tourism jong ka sorkar jylla, Bah Paul Lyngdoh u la pyntip ruh ha ki lad pathai khubor ba ka sorkar jylla ka la buh thong haduh ka 22tarik Naitung na ka bynta ban pynkynriah lut noh ïa ki nongdie madan na Khyndailad.
Shuh shuh u Myntri u la ïathuh ruh ba naduh katei ka sngi yn pyntreikam noh ïa ka kyndon ban shah tang ïa ki nongïaid kjat ban ïaid na katei ka jaka, kata na Khyndailad sha ki thain Umsohsun bad kumjuh na Khyndailad ban mih sha ki bynta jong ka Jail Road.
“Yn ym shah shuh ban ïaid kali na kine ki jaka. Na bynta kito kiba sah ha kitei ki jaka yn buh da ka por ban shah ïa ki kali ban mih bad ban rung da kaba ai da ki pass ban pynshisha,” ong u Myntri.
Ha kajuh ka por u Myntri u la ïathuh ruh ba hadien ba la dep ban pynkylluid, ka sorkar ka don ruh ïa ka thong ban pynitynnad shuh shuh ïa ka Khyndailad nangne shakhmat.
Katkum ka jingïathuh jong u, ka Meghalaya Urban Development Authority ka la don lypa ïa ka plan hakhmat ha kaba ia ka kylla kaba nyngkong jong kane ka projek ka la dep sdang mynta.
Lah ban kdew hangne ba ka sorkar jylla ka la tyrwa haduh 10,000 tyngka ka bai kyrshan ïa kito ki nongdie madan kiba la jied ban kynriah na ka jaka ba ki ju die baroh shi katta ha Khyndailad ba kin leit die noh sha ka jaka ba la pynkhreh da ka sorkar. Nalorkata, ka la kular ruh ban siew 2,000 tyngka man u bnai na ka bynta san bnai kum ka jingkyrshah ïa ki.